ტრამპს ჟურნალისტები არასასურველი კითხვების გამო არ გაუძევებია
მოკლედ საკითხავი
გავრცელებული ვიდეოს თანახმად, დონალდ ტრამპმა ჟურნალისტები, რომლებმაც ეპშტეინის ფაილებზე კითხვები დასვეს, ოვალური ოფისიდან გააძევა.
ვიდეოს სრულ მონაკვეთში ჩანს, რომ დონალდ ტრამპი 30 იანვარს ოვალურ ოფისში მიმართვისას შეკითხვებს საერთოდ არ პასუხობს;
ვიდეოში ეპშტეინის ფაილებთან დაკავშირებით კითხვები არ ისმის.
სოციალურ ქსელში გავრცელებული მტკიცების თანახმად, ვიდეოში ჩანს ამერიკის პრეზიდენტის მიერ ოვალური ოფისიდან იმ ჟურნალისტების გაძევება, რომლებმაც მას ეპშტეინის ფაილებთან დაკავშირებით კითხვები დაუსვეს (დაარქივებული ბმული).
ვიდეოში წარმოდგენილი კადრი ოვალურ ოფისში ტრამპისა და მისი ადმინისტრაციის წარმომადგენლების მიმართვიდან არის აღებული. სრული პირდაპირი ჩანაწერი YouTube-ზე ABC News-ის მიერ მიმდინარე წლის 30 იანვარს გამოქვეყნდა. ვიდეოში (21:10 წთ-დან) ჩანს, რომ ტრამპი მისი მიმართვის შემდეგ მისი ადმინისტრაციის წევრებს და ჟურნალისტებს მაშინვე მადლობას უხდის და მათ კარისკენ მიუთითებს. შესაბამისად, ჟურნალისტების კითხვებს საერთოდ არ პასუხობს. ამ დროს ოთახში ოფისის თანამშრომლობები შემოდიან და ჟურნალისტები გაყავთ. მიუხედავად შეხვედრის დასრულებისა, ჟურნალისტები, როგორც ვიდეოში ისმის, პრეზიდენტისთვის შეკითხვების დასმას მაინც ცდილობენ. ერთ-ერთი ჟურნალისტი დონალდ ტრამპს Fox News-ის ახალ გამოკითხვასთან დაკავშირებით კითხვას უსვამს ("ბატონო პრეზიდენტო შეგიძლიათ მიპასუხოთ Fox-ის ახალ გამოკითხვაზე, რომლის მიხედვითაც, ხალხი ICE-ის (აშშ-ის საიმიგრაციო სამსახური) თავდასხმებს ზედმეტად აგრესიულად მიიჩნევს?"). ამ კითხვის გარდა, ჟურნალისტების მიერ გაჟღერებული სხვა კითხვები ვიდეოში არ ისმის.
ამრიგად, გავრცელებულ მონაკვეთში არ ჩანს, რომ დონალდ ტრამპმა ოვალური ოფისიდან ის ჟურნალისტები გააძევა, რომლებმაც მას ეპშტეინის ფაილებზე კითხვები დაუსვეს.
ცნობისთვის, ფინანსისტ ჯეფრი ეპშტეინს სექსუალური ტრეფიკინგის საქმეზე ბრალი 2019 წელს წაუყენეს. ოფიციალური ცნობებით, ეპშტეინი ათობით არასრულწლოვანის სექსუალურ ტრეფიკინგს ეწეოდა. მან ციხეში სიცოცხლე თვითმკვლელობით დაასრულა. „ეპშტეინის ფაილები“ მოიცავს სასამართლოს დოკუმენტებს, მოწმეების ჩვენებებს, მტკიცებულებებსა და მასალებს. მიმდინარე წლის იანვრის ბოლოს აშშ-ის იუსტიციის დეპარტამენტმა ფაილებიდან დაახლოებით 3 მილიონ გვერდზე მეტი გამოაქვეყნა. მანამდე, გასულ წელს კონგრესმა მიიღო კანონი, რომელიც ტრამპის ადმინისტრაციას ფაილების გამოქვეყნებას ავალდებულებდა.
