რა ინფორმაცია ვრცელდება ვიდეოსთან დაკავშირებით, სადაც თითქოს ჩანს, რომ უკრაინაში მობილიზებულის დედა ინსულტით გარდაიცვალა

სოციალურ ქსელში Facebook-ანგარიშები ავრცელებენ ვიდეოს, რომელშიც ჩანს შუახნის ქალი, რომელიც ავტომობილს წინ ეღობება და შემდგომ მოულოდნელად გონებას კარგავს. ვიდეოს აღწერის თანახმად: „ხარკოვში, უკრაინის კომისარიატმა ახალგაზრდა მამაკაცი ქუჩიდან ომში წაიყვანა. დედა ინსულტით ადგილზე გარდაიცვალა“ (1; 2; 3; 4).

2025 წლის 8 ივლისს ხარკივის სოციალური მხარდაჭერის ცენტრმა (ТЦК) Facebook-ზე პოსტი გამოაქვეყნა, რითაც შემთხვევას ეხმაურებოდნენ. პოსტში წერია, რომ ცენტრის ჯგუფის მიერ პოლიციის თანამშრომელთან ერთად ჩატარებული ოპერაციის დროს, ერთ-ერთ მოქალაქეს სამხედრო აღრიცხვის დოკუმენტები შეუმოწმეს. დოკუმენტების შემოწმების შემდეგ მას გაყოლა შესთავაზეს, რათა ცენტრში მონაცემები დაეზუსტებინათ და სამხედრო-სამედიცინო კომისიის გავლასთან დაკავშირებით მიმართულება მიეცათ. ცენტრი აღნიშნავს, რომ მოქალაქე ყოველგვარი კონფლიქტის გარეშე მივიდა მათ ავტომობილთან.

ცენტრის თანახმად, რამდენიმე წუთში ადგილზე მივიდა მსუბუქი ავტომობილი, საიდანაც გადმოვიდა ასაკოვანი ქალი, რომელიც საკუთარ თავს სამხედრო ვალდებულის დედად წარადგენდა. მან დაიწყო ყვირილი და ავტომობილების გადაადგილებას აფერხებდა. ცენტრი პოსტში აღნიშნავს, რომ გონების დაკარგვის შემდეგ მოქალაქე სამედიცინო დაწესებულებაში გადაიყვანეს საჭირო დახმარების გასაწევად, თუმცა მან ჰოსპიტალიზაციაზე უარი განაცხადა.

როგორც ცენტრის Facebook-პოსტში წერია: „წინასწარი შემოწმების შედეგად დადგინდა, რომ სოციალური მხარდაჭერის ცენტრი წარმომადგენელთა მხრიდან აღნიშნული მოქალაქის მიმართ არანაირი უკანონო ქმედება არ განხორციელებულა“.

უკრაინულ მედია Волинська Служба Новин: VSN-სთან საუბრისას ხარკივის ოლქის პოლიციის მთავარი სამმართველოს წარმომადგენელმა ოლენა სობოლევსკამ განაცხადა, რომ ქალი არ გარდაცვლილა.

ინფორმაცია გადაამოწმა უკრაინულმა ფაქტების გადამმოწმებელმა ორგანიზაციამ StopFake.

ამგვარად, მტკიცება, რომლის თანახმადაც, ქალი ინსულტით გარდაიცვალა, სიმართლეს არ შეესაბამება.