დამონტაჟებული ვიდეო არასწორად წარმოაჩენს გიორგი ვაშაძის განცხადებას ქალებთან დაკავშირებით
სოციალურ მედიაში ვრცელდება ოპოზიციონერი პოლიტიკოსის, გიორგი ვაშაძის 2015 წელს “მძიმე კაცისთვის” მიცემული ინტერვიუ, რომელშიც თითქოს ის ამბობს, რომ უყვარს კლუბებსა და ბარებში დროის გატარება და ამ კონტექსტში აღნიშნავს, რომ „რაც მეტი ქალი, მით უკეთესი“. დამონტაჟებული ვიდეო მაყურებელს უქმნის მცდარ შთაბეჭდილებას, თითქოს პოლიტიკოსი ქალებზე საუბრობს წვეულებების, კლუბებისა და ბარების კონტექსტში.
სინამდვილეში, დამონტაჟებული ვიდეო აერთიანებს გიორგი ვაშაძის ორ პასუხს ორ სხვადასხვა კითხვაზე. ორიგინალი ინტერვიუს გადამოწმება აჩვენებს, რომ ფრაზა „რაც მეტი ქალი, მით უკეთესი“ ვაშაძემ გამოიყენა ქალების პოლიტიკაში მონაწილეობის შესახებ კითხვის პასუხის გაცემის დროს.
