ჟურნალისტ ირაკლი ტაბლიაშვილის პერფორმანსი კონტექსტის გარეშე გავრცელდა

მოკლედ საკითხავი

• სოციალურ ქსელში გადაცემა „კონტექსტიდან“ კადრი ვრცელდება, რომელშიც წამყვანი ასაფეთქებელ ნივთს აფეთქებს;

• ვიდეოს დამატებითი კონტექსტის გარეშე მაყურებელი შეცდომაში შეჰყავს;

• გადაცემის სრულ მონაკვეთში ჩანს, რომ ტაბლიაშვილი პერფორმანსს პოლიტიკური ალეგორიისთვის იყენებს.

სოციალურ ქსელში ტელეკომპანია „ფორმულას“ გადაცემიდან „კონტექსტი“, კადრი ვრცელდება (1; 2; 3) , რომელშიც წამყვანი ირაკლი ტაბლიაშვილი ასაფეთქებელ საშუალებას აფეთქებს და ამბობს: „ახლა ერთ ისეთ რამეს გავაკეთებ, რომ შესაძლოა, წამიერად დაფრთხეს მაგალითად ლაშა ან ნიკა [გადაცემის ოპერატორები], ან უფრო ზუსტად შეცბუნდნენ და ნახეთ, დააკვირდით რას გავაკეთებ ახლა“. „ახალმა წელმაც ვერ უშველა“, – ვკითხულობთ სოციალურ ქსელში გავრცელებულ ვიდეოს აღწერაში.

აღნიშნული მონაკვეთი  გადაცემაში „კონტექსტი“, რომლის წამყვანიც ჟურნალისტი ირაკლი ტაბლიაშვილია,  2024 წლის 6 ივლისს გავიდა. გადაცემის სრულ ჩანაწერში ჟურნალისტი ტაბლიაშვილი ხსნის, თუ რის საჩვენებლად გამოიყენა ასაფეთქებლით პერფორმანსი: „ერთია ჰიბრიდული დიდი ომი ჩვენ წინააღმდეგ და მეორეა ჰიბრიდული „ხლაპუშკები“, რომლებიც ფეხებთან ხშირად გვიფეთქდება, მყისიერად გვაშინებს, როგორც ბიჭები დაშინდნენ [იგულისხმება გადაცემის ოპერატორები], გვაფრთხობს, ვინაიდან „ხლაპუშკებია“, შიშიც მათ მიმართ გაგვდის უკვე შემდგომ“. ერთ-ერთ ასეთ „ხლაპუშკად“ ტაბლიაშვილი ირაკლი კობახიძის „გლობალური ომის პარტიის“ შესახებ განცხადებას მიმოიხილავს. კობახიძის განცხადების განხილვის  შემდეგ ტაბლიაშვილი აცხადებს, რომ სწორედ კობახიძეს უწოდებს „ჰიბრიდულ ხლაპუშკას“, რომელიც „ამგვარი განცხადებებით, თითქოს გვაშინებს, წამიერად გვაფრთხობს, ეფექტს ახდენს, თუმცა თუ აქამდე ერთი დღით ვიყავით დაშინებულები, ახლა „ხლაპუშკა“ კობახიძის სიტყვებით დაშინების დრო ძალიან შემცირებულია და ამის უფლებაც არ გვაქვს, რომ შევუშინდეთ „ხლაპუშკა“ კობახიძის თუ სხვების ბოდვას“.

შესაბამისად, ტაბლიაშვილი აღნიშნულ პერფორმანსს იმ ეფექტის საჩვენებლად იყენებს, რაც მისი თქმით, „ქართული ოცნების“ პროპაგანდისტულ განცხადებებს მოსდევს. პერფორმანსის აღნიშნული კონტექსტი გავრცელებულ ვიდეოში არ ჩანს და შეცდომაში შემყვანია.