დეზინფორმაცია: „პატრიოტთა ალიანსმა“ „ნაციონალურ მოძრაობასთან“ კოალიცია შეკრა
სოციალურ ქსელებში Facebook-ანგარიშები ავრცელებენ ინფორმაციას, რომლის თანახმადაც „პატრიოტთა ალიანსმა“ „ნაციონალურ მოძრაობასთან“ კოალიცია შეკრა. მტკიცებულებად წარმოდგენილია „ტვ პირველის“ პოსტი, რომელზეც „კოალიცია ცვლილებისთვის“ ერთ-ერთი ლიდერი ნიკა მელია და „პატრიოტთა ალიანსის“ წევრი გოჩა თევდორაძე და გოჩა ჯოჯუა ჩანან. სინამდვილეში, გავრცელებული ინფორმაცია არ დასტურდება (1; 2; 3).
აღნიშნულ ინფორმაციას „პატრიოტთა ალიანსის“ გენერალური მდივანი, ირმა ინაშვილი საკუთარ Facebook-გვერდზე გამოეხმაურა და განაცხადა, რომ ინფორმაცია სიმართლეს არ შეესაბამება: „გათენდა მენელსაცხებლე დედათა დღე. ვიღაცა სუსის აგენტი, ან ბრიყვი, ან, უბრალოდ, იდიოტი წერს, რომ თითქოსდა პატრიოტთა ალიანსი ნაცმოძრაობას შეეკრა. ვპასუხობ: ნაციონალების რეჟიმი დაამხო პატრიოტთა ალიანსმა და თქვენ-ამ სისულელის დამწერნი, ვინც სუსის აგენტები ხართ, მაშინ კუდის აგენტები იყავით! ვინც ბრიყვები ხართ, მაშინაც ბრიყვები იყავით და ფეისბუქიდან იფურთხებოდით, მეტი არაფერი გიკეთებიათ. ახლაც იგივეს აგრძელებთ. პატრიოტთა ალიანსი არასდროს არავის არ შეკვრია და არც შეეკვრება და თუ ვინმეს სჯერა, რომ ნაცებს შევეკარით, ფსიქიატრს მიმართოს. ბევრი კარგი ფსიქიატრი ჰყავს საქართველოს…
და საიდანაც მოდის ეს კამპანია, ესეც კარგად ვიცი და ნუ ამალაპარაკებთ, “ქართულ ოცნებაში” იმპორტირებულო, მამალო ნაცებო! ასევე, აგენტებო და ბრიყვებო! და დეგენერატებო, რომლებსაც ამ ქვეყნისთვის არასდროს არაფერი სიკეთე არ გაგიკეთებიათ.
ზოგიერთმა, ახლადგამოჩეკილმა პარტიულმა ჯგუფებმაც დააყენეთ ერთი ადგილი. კუდები გიჩანთ“, – წერს ინაშვილი პოსტში.
დამატებით, იმის მტკიცებულებად, რომ თითქოს „პატრიოტთა ალიანსი“ და „ნაციონალური მოძრაობა“ გაერთიანდნენ, ნიკა მელიას ფოტოა მოყვანილი, თუმცა მელიამ „ნაციონალური მოძრაობა“ 2023 წლის 8 დეკემბერს დატოვა და ამჟამად ის „კოალიცია ცვლილებებისთვის“ ერთ-ერთი ლიდერია. საგულისხმოა ისიც, რომ „ტვ პირველის“ პოსტი და მასზე არსებული ფოტო ოპოზიციური პარტიებისა და ახალგაზრდული საზოგადოებრივი ჯგუფების 2025 წლის 4 მაისის შეხვედრას აღწერს, რომელიც პაატა ბურჭულაძის ინიციატივით ჩატარდა.
შეხვედრის კადრებში, რომელიც „ტვ პირველის“ სიუჟეტიდანაა აღებული, ვხედავთ, რომ მელია ესალმება და ხელს ართმევს „პატრიოტთა ალიანსის“ წევრს გოჩა ჯოჯუას, მის გვერდით კი დგას გოჩა თევდორაძე. ამ საკითხზე 2025 წლის 5 მაისს „ობიექტივის“ ეთერში გადაცემაში „კრიტიკული აზრი“, „პატრიოტთა ალიანსის“ წევრებმა გიორგი ლომიამ და გოჩა ჯოჯუამ სოციალურ ქსელში გავრცელებული დეზინფორმაციაზე ისაუბრეს და აღნიშნულ შემთხვევას შავი პიარი უწოდეს. მათი თქმით, ჯოჯუა შეხვედრაზე მივიდა იმის გამო, რომ ეს პაატა ბურჭულაძის თხოვნა იყო. ჯოჯუამ ქვეყანაში არსებულ დაძაბულ სიტუაციასა და დიალოგის აუცილებლობაზე ისაუბრა: „[ბატონი პაატა ბურჭულაძე] ამ იდეით მოვიდა [ჩემთან] რომ მე მაქვს ასეთი იდეა, რომ მე მინდა პოლიტიკურ ჯგუფებს დაველაპარაკო, ვუთხრა. თქვენ ერთმანეთს რადგანაც, ჩვეულებრივი რამეა, ზოგი დაპირისპირებულია, ზოგი, დაპირისპირება სიტყვაც კი შეიძლება ნაკლებად წარმოაჩენს იმას რა მდგომარეობაშიც პოლიტიკური პარტიებია, მაგრამ, რბილი სიტყვით, კონკურენტები არიან, ერთმანეთთან ვერ სხდებიან, ერთმანეთთან ვერ ლაპარაკობენ, არ ლაპარაკობენ და არ ცდილობენ იმას, რომ დაილაპარაკონ, მაგრამ არის საკითხი, რომელზედაც შეიძლება ნებისმიერ შემთხვევაში და ეს ხშირად ყოფილა „ქართულ ოცნებას“ გახსოვთ, უთქვია, როდესაც „ქართული ოცნება“ იბარებდა, ყველა პოლიტიკური პარტიები ერთად დავჯდეთ, მათ შორის, „ნაცმოძრაობაც“ იყო და ყველა იყო, მაშინ ეს ჩვეულებრივ ამბად აღიქმებოდა, ამ შემთხვევაშიც, მცდელობა არის მხოლოდ ერთი რამის, მოიძებნოს გზა გამოსავლისა…[სტილი დაცულია]“
ამდენად, ფოტოზე არა „პატრიოტთა ალიანსსა“ და „ნაციონალურ მოძრაობას“ შორის გამართული შეხვედრის, არამედ სხვა ღონისძიების კადრებია, სადაც სხვა ბევრ ადამიანთან ერთად კოალიცია ცვლილებებისთვის ლიდერი ნიკა მელია და „პატრიოტთა ალიანსის“ წევრები გოჩა თევდორაძე და გოჩა ჯოჯუა იმყოფებოდნენ.
