ურსულა ლაიენის ციტატა თურქეთის ევროკავშირში უკრაინის შემდეგ გაწევრიანების შესახებ ყალბია
სოციალურ ქსელში ვრცელდება ფოტო, რომელშიც ევროკომისიის პრეზიდენტი ურსულა ფონ დერ ლაიენი და თურქეთის პრეზიდენტი რეჯეფ თაიფ ერდოღანი არიან გამოსახული. ფოტოს თან ერთვის რუსულენოვანი წარწერა, რომელიც ამტკიცებს, რომ ევროკომისიის პრეზიდენტმა თურქეთს დაპირდა, რომ ის ევროკავშირში უკრაინის შემდეგ გაწევრიანდება (არქივირებული ბმული). 
Google-ის ფოტოს უკუძიების ინსტრუმენტით ძიებით ირკვევა, რომ ერთობლივი ბრიფინგის ფოტო ევროკომისიის პრეზიდენტის 2024 წლის 17 დეკემბერს თურქეთში ვიზიტის დროსაა გადაღებული (არქივი). ევროკომისიის ოფიციალურ ვებგვერდზე გამოქვეყნებული ინფორმაციის თანახმად, კომისიის პრეზიდენტი თურქეთსა და იორდანიაში სირიაში ასადის რეჟიმის დაცემის შემდეგ ჩავიდა, რათა შექმნილ ვითარებაზე ემსჯელა და სირიის მომავლის შესახებ მათთვის ევროპის ხედვა წარმოედგინა. ოფიციალურ პრესრელიზში აღნიშნულია, რომ ურსულა ფონ დერ ლაიენმა შეხვედრისას ხაზი გაუსვა თურქეთის როლს სირიელი ლტოლვილების წლების განმავლობაში მასპინძლობაში. ევროკომისიის პრეზიდენტმა ასევე გამოაცხადა დამატებით 1 მილიარდი ევროს გამოყოფა ლტოლვილთა ჯანდაცვისა და განათლების მხარდასაჭერად. შეხვედრის ოფიციალურ ცნობებში თურქეთის ევროკავშირში გაწევრიანებაზე ლაიენის განცხადება არ იძებნება.
ფოტოსგან დამოუკიდებლად "ჯეოფაქტსმა" გადაამოწმა ლაიენსა და ერდოღანს შორის ჩატარებული ბოლოდროინდელი შეხვედრები. მაგალითად, 2026 წლის ივლისში ლაიენი თურქეთში NATO-ს სამიტის ფარგლებში იმყოფებოდა, რა დროსაც მან, ევროსაბჭოს პრეზიდენტ ანტონიო კოშტასთან ერთად, პირისპირ შეხვედრა გამართა თურქეთის პრეზიდენთან. თურქული მედიის თანახმად, შეხვედრის შემდეგ ერდოღანმა პრესასთან თურქეთის ევროკავშირში გაწევრიანების პროცესზე ისაუბრა და აღნიშნა (არქივი), რომ „თურქეთის 53-წლიანი ლოდინი სისასტიკეა“. მან ფრთხილი იმედი გამოთქვა, რომ ევროპელი ლიდერები საბოლოოდ „გააღებენ კარს“, და დასძინა, რომ ეს საკითხი იმავე დღეს უკვე წამოჭრა გერმანიის კანცლერთან და სამიტის განმავლობაში ფონ დერ ლაიენთან და სხვა ლიდერებთან მის განხილვასა და მასზე ზეწოლის გაგრძელებას აპირებდა. ამდენად, არც აღნიშნულ შეხვედრაზე დასტურდება, რომ ევროკომისიის პრეზიდენტს თურქეთის გაწევრიანებასთან დაკავშირებით მსგავსი დაპირება გაეცეს.
დამატებით, მთლიანი ფოტოს ძიებისას ირკვევა, რომ მისი თავდაპირველი ვერსია რუსულენოვანმა ანგარიშებმა გაავრცელეს (ბმული 1, 2, 3). ფოტოს ორიგინალი წყარო რუსულენოვანი სატირული ტელეგრამ გვერდია.
