სოციალურ ქსელში ბილ გეითსის კომენტარები კონტექსტის გარეშე ვრცელდება

მოკლედ საკითხავი

ქართულ ფეისბუქ სივრცეში გავრცელებულ ბილ გეითსის ვიდეოზე დაყრდნობით, გამავრცელებელი ამტკიცებს, რომ გეითსი გადაწყვეტს რომელი ადამიანი იქნება სამომავლოდ საჭირო და რომელი ჩანაცვლდება ხელოვნური ინტელექტის მიერ.

ბილ გეითსის სრული კომენტარები ცხადად აჩვენებს, რომ გეითსი ასეთი გადაწყვეტილების მიმღებად არა საკუთარ თავს, არამედ ზოგადად კაცობრიობას მოიაზრებს.

ქართულ ფეისბუქ სივრცეში გავრცელდა მოკლე მონაკვეთი ბილ გეითსის ინტერვიუდან, სადაც ის ხელოვნურ ინტელექტსა და ადამიანების მომავალზე საუბრობს (დაარქივებული ბმული). მონაკვეთის გამავრცელებლის მტკიცებით, ბილ გეითსი აპირებს თავად გადაწყვიტოს მომავალში რომელი ადამიანი შეინარჩუნებს სამსახურს და რომელი ჩანაცვლდება ხელოვნური ინტელექტის მიერ.

ბილ გეითსის ინტერვიუ, საიდანაც ქართულ ფეისბუქ სივრცეში გავრცელებული მონაკვეთია აღებული, აშშ-ის საზოგადოებრივი მაუწყებლის NBC-ის ეთერში გავიდა. გეითსი პოპულარული ამერიკელი კომედიანტის, ჯიმი ფელონის გადაცემას The Tonight Show-ს სტუმრობდა. ინტერვიუს დროს საუბარი, სხვა მრავალ თემასთან ერთად, შეეხო ხელოვნურ ინტელექტსაც და კაცობრიობის მომავალს ხელოვნური ინტელექტის განვითარების შედეგად გამოწვეული მოსალოდნელი ცვლილებების გათვალისწინებით.

წამყვანმა ბილ გეითს სთხოვა მარტივი ტერმინოლოგიით, ჩვეულებრივი ადამიანებისთვის გასაგებად აეხსნა თუ რა დადებითი და უარყოფითი მხარეები აქვს ხელოვნური ინტელექტის განვითარებას. გეითსმა საპასუხოდ ისაუბრა, რომ მოსალოდნელია ბევრი სერვისი, რომელიც ადრე რთულად ხელმისაწვდომი ან ძვირი იყო, ხელოვნური ინტელექტის წყალობით უფასო ან ბევრად უფრო ხელმისაწვდომი გახდეს მასებისთვის, რის მაგალითადაც მან სამედიცინო სფერო და განათლება დაასახელა.

ამის საპირწონედ, ბილ გეითსმა ასევე თქვა, რომ დადებით მხარეებს ასევე მოჰყვება გაურკვევლობა თუ როგორი იქნება მომავალი სამუშაო ბაზარი, რაზე და რა სიხშირით იმუშავებენ ადამიანები, რაც გეითსის აზრით სამართლიანად იწვევს შფოთვას.

სწორედ ამ კონტექსტში წამყვანმა გეითსს მორიგი კითხვა დაუსვა: "კვლავაც დაგვჭირდება ადამიანები?" რაზეც გეითსის პასუხი იყო "უმრავლესობა რაღაცებისთვის არა." ამან დარბაზში სიცილი და წამყვანის გაოცება გამოიწვია. ფელონმა სატირულად იმედი გამოთქვა, რომ კომედიური გადაცემების წასაყვანად ადამიანები კვლავაც საჭირო იქნებიან.

გეითსმა ამის შემდგომ გააგრძელა განმარტება, რომ კაცობრიობა გადაწყვეტს რომელი სფეროები შეინარჩუნოს ადამიანების ჩართულობისთვის და რომლები გადააბაროს ხელოვნურ ინტელექტს. მაგალითისთვის, გეითსმა თქვა, რომ დიდი ალბათობით ადამიანებს არ ექნებათ სურვილი რობოტების მიერ ბეისბოლის თამაშს ან სხვა ნებისმიერ სპორტს უყურონ, თუმცა რაც შეეხება სოფლის მეურნეობას, წარმოებას და ტრანსპორტირებას, გეითსის აზრით ამ სფეროებში ხელოვნური ინტელექტი ბევრ პრობლემას გადაჭრის.

აღნიშნული კომენტარებისას გეითსი მუდმივად საუბრობდა ჩვენობითი ფორმით, ამბობდა რა "ჩვენ მოვიფიქრებთ", "ჩვენ გადავწყვეტთ". ინტერვიუს კონტექსტის გათვალისწინებისას აშკარაა, რომ ის მხოლოდ საკუთარ თავზე ან მის გარშემო ვიწრო წრეზე კი არ საუბრობდა, არამედ ზოგადად კაცობრიობაზე, როგორც გადაწყვეტილების მიმღებ ერთიანობაზე.