სოციალურ ქსელში აქციის მონაწილის კომენტარი კონსტექსტის გარეშე ვრცელდება

სოციალურ ქსელებში Facebook-სა და TikTok-ზე გავრცელდა (ბმული 1, 2, 3, 4, 5, არქივირებული ბმული) "სტრატეგია აღმაშენებლის" ლიდერის, გიორგი ვაშაძის 16 მაისის ლაივ-ჩართვიდან მონაკვეთი. გავრცელებულ მონაკვეთში ჩანს, რომ ვაშაძის კითხვაზე, მოდის თუ არა 26 მაისის აქციაზე, მოქალაქე პასუხობს: "მე 26-ში კი არა, აგერ [ყელში] მაქვს ეს აქციები ამოსული". ვიდეო აქ წყდება და გრძელდება ცნობილი მიმით "გადაღებულია რობერტ. ვეიდის მიერ", რაც ერთობლიობაში ქმნის შთაბეჭდილებას, თითქოს პოლიტიკოსს ისეთი მოქალაქე შეხვდა, რომელიც საქართველოში მიმდინარე საპროტესტო აქციებს ეწინააღმდეგება.

სრულ ვიდეოში, რომელიც გიორგი ვაშაძემ 2026 წლის 16 მაისს გამოაქვეყნა, ჩანს რომ მოქალაქე არა თავისთავად შეკრებას ეწინააღმდეგება, არამედ პოლიტიკოსს ხალხის შეკრების შემდგომ მოქმედების მექანიზმის არარსებობაზე მიუთითებს (3:45 წუთიდან): "მე 26-ში კი არა, აგერ [ყელში] მაქვს ეს აქციები ამოსული. ერთი დღე უნდა დავამთავროთ და ცხოვრება უნდა დავიწყოთ ნორმალური. ამისათვის მარტო შეკრება კი არ არის საჭირო, მექანიზმი უნდა შეიქმნას ისეთი, რომელმაც [აწყვეტინებს ვაშაძე კომენტარით, რომ 26-ში იქნება]. მე არ ვიცი რა იქნება 26-ში, თქვენ მექანიზმი გაქვთ, სისტემა შემუშავებული, რომ ხალხის რაოდენობა წავიდეს და რომელმაც მერე რო დამთავრდება.. ყველა თავისკენ საბანს წევს, ვინც კი მოსულა აქ ქვეყანაზე." გიორგი ვაშაძე შემდეგ აღნიშნავს, რომ 26 მაისს წარუდგენენ შესაბამის მექანიზმს, რის შემდეგაც მოქალაქე ამბობს: კი, ბატონო. 26-ის შემდეგ, მოდით და ვისაუბროთ".

ამდენად, სრული კონტექსტის გარეშე შესაძლოა მოჭრილმა ვიდეომ მცდარი შთაბეჭდილება შეუქმნას სოციალური ქსელის მომხმარებლებს, თითქოს ვაშაძის შემხვედრი მოქალაქე პროტესტის მოწინააღმდეგეა. სინამდვილეში, აღნიშნული მოქალაქე პოლიტიკოს შეკრების მიღმა გამარჯვების მექანიზმის მოფიქრების კონტექსტში მიმართავს და თავის მხრივ, შეკრებისა და აქციების მოწინააღმდეგე არ არის.