ხელოვნური ინტელექტით გენერირებულია სურათი, რომელშიც არსენი იაცენიუკი მალდივის კუნძულებზეა
მოკლედ საკითხავი
გავრცელდა ფოტო, თითქოს უკრანის ყოფილი პრემიერ-მინისტრი მალდივის კუნძულებზეა
სურათი ხელოვნური ინტელექტის მიერ გენერირებული ვიდეოს ფოტოანაბეჭდია
ვიდეოს პირველწყარო უკრაინული ტიკტოკ-გვერდია, რომელიც ხელოვნური ინტელექტის მიერ გენერირებულ ვიდეოებს აქვეყნებს
2026 წლის 28 აპრილს, უკრაინულმა ტიკტოკ-გვერდმა "naperedku", გამოაქვეყნა უკრაინის ყოფილი პრემიერ-მინისტრის, არსენი იაცენუკის ვიდეო. ვიდეოში იაცენუკი ტროპიკულ სანაპიროზე, ალკოჰოლური სასმლით ჩანს და უკრაინაში მიმდინარე ომზე საუბრობს.
ვიდეოში არაერთი ხელოვნური ინტელექტის არაერთი ნიშანი არის. მათ შორის, ტიკტოკზე არსებული ნიშანი, რომელიც ხელოვნური ინტელექტით გენერირებულ მასალას ედება. იმისათვის, რომ მასალის ამოცნობა გართულებულიყო, დეზინფორმაციის წყაროებმა ვიდეოს მხოლოდ ფოტოანაბეჭდი გაავრცელეს. ის თავდაპირველად უკრაინულმა წყაროებმა გაავრცელეს, თუმცა მალე რუსულმა ანგარიშებმა აიტაცეს. ქართულ საინფორმაციო სივრცეში ყალბი სურათი Facebook-ანგარიშებმა გაავრცელეს (ბმული 1, 2).
ტიკტოკ გვერდს მსგავსი შინაარსის უამრავი ვიდეო აქვს ატვირთული. ყველა ვიდეოში, რომელიც გვერდს აქვს ატვირთული, უკრაინის მაღალჩინოსნები ფიგურირებენ და ხელოვნური ინტელექტის არის გამოყენებული. აღწერაში ვკითხულობთ: "არხი პოლიტიკური სატირისთვის და მეტისთვის".
კონკრეტულად იაცენუკზე ტიკტოკ-გვერდს იგივე სახის რამდენიმე ვიდეო აქვს ატვირთული. მათ შორის, ერთ-ერთში, უკრაინის ყოფილი პრემიერ-მინისტრი ტროპიკული სანაპიროს ფონზე, კოქტეილით ხელში, უკრაინელებს აღდგომას ულოცავს. აღნიშნული ვიდეოც მომხმარებლების ნაწილმა რეალურად აღიქვა, შედეგად ის სხვადასხვა სოციალურ მედია პლატფორმებზეც გავრცელდა.
გარდა ამისა, კონკრეტულად იმ ვიდეოში, რომლის ფოტოანაბეჭდიც ქართულმა ანგარიშებმა გაავრცელეს, ხელოვნური ინტელექტის რამდენიმე ცხადი ნიშანია. პირველ რიგში, იაცენუკი საკუთარ თავს ვიდეოს თავად უღებს, მაგრამ მარჯვენა ხელი, რომელშიც წესით მოწყობილობა უნდა ეჭიროს, ქვემოთ არის დაშვებული. ამავდროულად, ფონზე ზღვის გარდა არაფერი იძვრის - პალმის ხეები სტატიკურია, კურორტის არსებობის მიუხედავად კი გარშემო ადამიანები არ არიან.
