აშშ-ში უკრაინის ელჩი არ არის ქალი, რომელმაც ტრამპზე თავდასხმის დროს მაგიდიდან შამპანური აიღო

მოკლედ საკითხავი

25 აპრილს ვაშინგტონში, თეთრი სახლის კორესპონდენტთა ასოციაციის სადილის დროს აშშ-ის პრეზიდენტზე, დონალდ ტრამპზე თავდასხმის შემდეგ გავრცელდა ვიდეო, თუ როგორ იღებს მაგიდიდან უცნობი ქალი შამპანურის ბოთლს;

რუსულმა საინფორმაციო არხებმა უცნობი ქალი წარმოაჩინეს, როგორც აშშ-ში უკრაინის ელჩი, ოლგა სტეფანიშინა;

სტეფანაშინა სადილს ესწრებოდა და ვიდეოში ნაჩვენები ქალისგან სრულიად განსხვავებული ჩაცმულობა და ვარცხნილობა ჰქონდა.

2026 წლის 25 აპრილს, ვაშინგტონში, „ჰილტონის“ სასტუმროში, სადაც თეთრი სახლის კორესპონდენტთა ასოციაციის მიერ ორგანიზებული სადილი იმართებოდა, სროლა იყო. სროლის შედეგად არავინ დაშავებულა, ხოლო ეჭვმიტანილი, 31 წლის კოულ ტომას ალენი, მაშინვე დააკავეს, თუმცა შემთხვევას ქაოსი მოჰყვა. სროლის შემდგომ დღეს ამერიკულ მედიაში გავრცელდა ვიდეო, რომელშიც ჩანს, თუ როგორ იღებს უცნობ ქალი სროლის შემდეგ ერთ-ერთი მაგიდიდან შამპანურის ბოთლს. 27 აპრილს, რუსულმა ტელეგრამ არხმა და პლატფორმა X-ის ანგარიშებმა (1, 2, 3, 4) გაავრცელეს მტკიცება, რომ ვიდეოში აღბეჭდილი ქალი აშშ-ში უკრაინის ელჩი, ოლგა სტეფანიშინა არის. სწორედ X-ის პრორუსულ ანგარიშებზე დაყრდნობით გავრცელდა მტკიცება ქართულ საინფორმაციო სივრცეშიც.

აშშ-ში უკრაინის ელჩი, ოლგა სტეფანიშინა მართლაც ესწრებოდა თეთრი სახლის კორესპონდენტთა ასოციაციის სადილს, თუმცა ვიდეოში აღბეჭდილი ქალისგან სრულიად განსხვავებული ჩაცმულობა და თმის სტილი ჰქონდა.

მარცხნივ: სტეფანიშინა როიტერსის კადრში. მარჯვნივ: სტეფანაშინას მიერ გამოქვეყნებული სურათი

სურათების შედარებით ჩანს, რომ აშშ-ში უკრაინის ელჩს ვერცხლისფერი ტანსაცმელი აცვია და არ აქვს მოსაცმელი, ვიდეოში აღბეჭდილ ქალს კი შავი შარვალი და მოსაცმელი აცვია.

ამავდროულად, ელჩს თმები შედარებით მოკლე აქვს და მხოლოდ კისრამდე ჩამოსდის, განსხვავებით ვიდეოში აღბეჭდილი ქალისგან, რომელსაც თმები მკერდამდე ჩამოსდის.

ამდენად, რუსული ანგარიშების მიერ გავრცელებული მტკიცება სიმართლეს არ შეესაბამება და უკრაინის დისკრედიტაციას ისახავს მიზნად.