მტკიცება, რომ ზოჰრან მამდანი ჯეფრი ეპსტინის ოჯახის წევრია, სიმართლეს არ შეესაბამება

სოციალურ ქსელში Facebook-მომხარებელი ავრცელებს ინფორმაციას, თითქოს ნიუ-იორკის მერი ზოჰრან მამდანი ჯეფრი ეპსტინის ოჯახის წევრია. პოსტს თან ახლავს ფოტო, რომელშიც ჩვილი მამდანი დედასთან, მირა ნაირასთან, ტრეფიკინგში ბრალდებულ ჯეფრი ეპსტინსა და აშშ-ის 42-ე პრეზიდენტთან ბილ კლინტონთან ერთად ჩანს. პოსტში ასევე მოცემულია ინფორმაცია, რომ მირა ნაირი ჯეფრი ეპსტინის მეილშია მოსხენიებული და რომ იგი მიჩ ეპსტინის მეუღლე იყო. აღნიშნული მტკიცებების გაერთიანებით პოსტის ავტორი ამტკიცებს, რომ ზოჰრან მამდანი ჯეფრი ეპსტინის ოჯახის წევრი და "მისი ფავორიტია".

სინამდვილეში, პოსტში მცდარი და რეალური ამბები მომხმარებლის შეცდომაში შეყვანის მიზნით აღრეული.

ზოჰრან მამდანი 2026 წლის 1-ლ იანვარს ნიუ-იორკის 112-ე მერი გახდა . მისი მშობლები რეჟისორი მირა ნაირი და მაჰმუდ მამდანი არიან, მისი მამინაცვალი კი მირა ნაირის ყოფილი მეუღლე მიტჩელ (მიჩ) ეპსტინია, ამერიკელი ფოტოგრაფი და არტისტი, რომელიც აშშ-ში დიდი პუპულარობით სარგებლობს. მტკიცებები, რომ მიჩ ეპსტინსა და ჯეფრი ეპსტინს შორის ნათესაური/ოჯახური კავშირები არსებობს, არ დასტურდება. მათ მხოლოდ ერთნაირი გვარი აქვთ და საჯარო წყაროებში, ბიოგრაფიულ თუ პროფესიულ ჩანაწერებში მეტი კავშირის შესახებ ინფორმაცია არ იძებნება.

რაც შეეხება მირა ნაირის სახელის აღმოჩენას ჯეფრი ეპსტინთან დაკავშირებულ ელექტორნულ ფოსტაში, სიმართლეა. ზოჰრან მამდანის დედის სახელი ჯეფრი ეპსტინის იმ საქმეებში ფიგურირებს, რომლებიც ამერიკის შეერთებული შტატების იუსტიციის დეპარტამენტმა 30 იანვარს გამოაქვეყნა. ნაირის სახელი საქმეში ჯეფრი ეპსტინის, გისლეინ მაქსველის მიერ გამართული კინოწვეულების კონტექსტშია მოხსენიებული. კერძოდ, ნაირი მაქსველის სახლში გამართული კინოწვეულების სტუმრებს შორის იყო. ცნობების თანახმად, წვეულება მისი ფილმის, „ამელიას“ ჩვენების შემდეგ მოეწყო. ელექტრონული წერილი 2009 წლის 21 ოქტომბრითაა დათარიღებული, რომელშიც პეგი სიგალი (ამერიკელი პუბლიცისტი და კინომარკეტერი) წერს: „ახლახან დავტოვე გისლეინის სახლი... ფილმის შემდგომი წვეულება. იქ იყვნენ ბილ კლინტონი და ჯეფ ბეზოსი... ჯინ პიგოცი, რეჟისორი მირა ნაირი... და ა.შ.“. მიმოწერაში მირა ნაირის სახელი სხვებთან ერთად მართლაც ნახსენებია, თუმცა დეტალებისა და გარემოებების აღწერის გარეშე. მეილში არ იკვეთება ჯეფრი ეპსტინთან არანაირი პირადი ან პროფესიული ურთიერთობის შესახებ ინფორმაცია, მასთან ერთად მოგზაურობა, მიმოწერა თუ მის დანაშაულებში თანამონაწილეობა.

ამრიგად, ზოჰრან მამდანისა და მირა ნაირის პერსონალური კავშირები ჯეფრი ეპსტინთან და მის სავარაუდო დანაშაულებში მონაწილეობა საჯარო წყაროებსა და საგამოძიებო დოკუმენტებში არ დასტურდება.

რაც შეეხება სოციალურ ქსელში გავრცელებულ ფოტოს, რომელშიც ჯეფრი ეპსტინი, ბილ კლინტონი, მირა ნაირი და ჩვილი მამდანია ასახული, ხელოვნური ინტელექტის მიერაა შექმნილი. ფოტოს ძიების ინსტრუმენტის (reverse image search) საშუალებით "ჯეოფაქტსმა" დაადგინა, რომ ფოტოს პირველწყარო სოციალური პლატფორმა X-ის სატირული ანგარიში Dumb Fck Finder-ია (DFF). აღსანიშნავია, რომ ზოჰრან მამდანისა და ჯეფრი ეპსტინის AI ფოტოები ანგარიშს არაერთხელ გამოუქვეყნებია (1, 2, 3). ანგარიშს აღწერაში მითითებული აქვს, რომ სატირული ანგარიშია (Parody account) და ამერიკული პოლიტიკის შესახებ მაღალი ხარისხის AI ვიდეოებსა და ე.წ. მიმებს (meme) აქვეყნებს.

მამდანის, ნაირის, ეპსტინისა და კლინტონის ფოტოს X-ზე საზოგადოებრივი კომენტარიც (community note) ერთვის, რომელშიც მითითებულია, რომ: "ამ პოსტში მოცემული სურათები გენერირებულია და არ იძებნება ეპსტინის გამოქვეყნებულ ფაილებში. მირა ნაირი მხოლოდ 2009 წელს გაგზავნილ ელექტრონულ წერილშია მოხსენიებული, როგორც გისლეინ მაქსველის მიერ ორგანიზებული, ფილმის შემდგომი წვეულების სტუმარი".

როგორც ფოტოში ჩანს, ზოჰრან მამდანი ჩვილადაა წარმოჩენილი. თუ გავითვალისწინებთ, რომ მირა ნაირას ჯეფრი ეპსტინის საქმეში მოხსენიება 2009 წლით თარიღდება, ხოლო მამდანი 1991 წელს დაიბადა - გამოდის, რომ ამ დროს მამდანი 18 წლის უნდა ყოფილიყო. ეს ასაკი კი მის ჩვილის გამოსახულებას არ ემთხვევა. აღნიშნულთან დაკავშირებით, DFF-მა თავადვე დაწერა, რომ მამდანი ფოტოში ჩვილად სპეციალურად აქცია, რათა ფოტო 34 წლი წინ გადაღებული გამოსულიყო.

აღსანიშნავია, რომ ჯეფრი ეპსტინისა და ზოჰრან მამდანის AI ფოტოებს თავად ნიუ-იორკის მერიც გამოეხმაურა და აღშფოთება გამოთქვა იმის შესახებ, თუ რამდენად მარტივად, სწრაფად და მასობრივად ვრცელდება ფოტოები, რომლებიც აშკარად ყალბია.

აღსანიშნავია, რომ მამდანის შესახებ მსგავსი მტკიცებები უცხოურმა ფაქტების გადამმოწმებელმა და საერთასორისო მედიებმაც გადაამოწმეს (1, 2, 3).