გრენლანდია რუსეთის შემადგენლობაში არ გადადის

მოკლედ საკითხავი

• სოციალურ ქსელში გავრცელდა ინფორმაცია, თითქოს გრენლანდია რუსეთის შემადგენლობაში გადავიდა და ეს რუსულმა ტელეარხმა НТВ-მ გააშუქა;

• НТВ-ს ვებგვერდზე მსგავსი ინფორმაცია არ იძებნება;

• გრენლანდიის რუსეთზე გადაცემის შესახებ არც რუსულ და არც დასავლურ მედიას არ დაუწერია.

სოციალურ ქსელში ვრცელდება ინფორმაცია, რომლის თანახმადაც გრენლანდია რუსეთის შემადგენლობაში გადადის. მტკიცების თანახმად ინფორმაცია რუსულმა ტელეარხმა НТВ-მ გააშუქა (არქივირებული ბმული).

ტელეკომპანია НТВ-ს ვებგვერდზე, სადაც სიახლეები ვიდეოებისა და სტატიების სახით ქვეყნდება, საკვანძო სიტყვით „გრენლანდია“ ძიებისას, მსგავსი შინაარსის ინფორმაცია არ იძებნება.

გრენლანდიის რუსეთის შემადგენლობაში შესვლასთან დაკავშირებით ინფორმაცია არც სხვა რუსულ (1; 2; 3) ან დასავლურ მედიას (1; 2; 3) გაუვრცელებია.

ცნობისთვის, დონალდ ტრამპმა 2024 წლის აშშ-ის საპრეზიდენტო არჩევნებში გამარჯვებისთანავე გრენლანდიასთან დაკავშირებით არა ერთი განცხადება გააკეთა.  მან გრენლანდიის შეძენის სურვილი გამოთქვა და აღნიშნა, რომ  არქტიკული კუნძული „კრიტიკულია“ აშშ-ის ეროვნული და ეკონომიკური უსაფრთხოებისთვის (კუნძული ამჟამად ნატოს წევრი დანიის დაქვემდებარებაშია და ფართო ავტონომიით სარგებლობს). მიმდინარე კვირაში დონალდ ტრამპმა კიდევ ერთხელ გაიმეორა  აშშ-ის მიერ გრენლანდიაზე  კონტროლის დაწესების აუცილებლობა და აღნიშნა, რომ  „აპირებს რაიმეს გაკეთებას გრენლანდიასთან დაკავშირებით“.  „თუ ჩვენ ამას არ გავაკეთებთ, რუსეთი ან ჩინეთი დააწესებენ გრენლანდიაზე კონტროლს და ჩვენ არ გვინდა, რომ რუსეთი ან ჩინეთი ჩვენი მეზობლები იყვნენ“, – განაცხადა ტრამპმა.

რაც შეეხება რუსეთის დამოკიდებულებას გრენლანდიის საკითხთან დაკავშირებით. 2026 წლის 16 იანვარს კრემლის პრესსპიკერმა დიმიტრი პესკოვმა განაცხადა, რომ რუსეთი გრენლანდიას დანიის ნაწილად მიიჩნევს. ამის შემდეგ რუსეთის საგარეო საქმეთა მინისტრმა სერგეი ლავროვმა 2026 წლის 20 იანვარს განაცხადა: „გრენლანდია დანიის ბუნებრივი ნაწილი არ არის. ის არც ნორვეგიის ბუნებრივი ნაწილი ყოფილა და არც დანიის. ეს კოლონიური დაპყრობის შედეგია“.  ხოლო 2026 წლის 22 იანვარს ვლადიმირ პუტინმა რუსეთის უშიშროების საბჭოს მუდმივ წევრებთან თათბირზე თქვა, რომ რუსეთს: „საერთოდ არ ეხება ის, რაც გრენლანდიასთან დაკავშირებით ხდება“ და საკითხი შეერთებულმა შტატებმა და დანიამ, რომელთა ისტორიული დამოკიდებულება კუნძულის მიმართ მან გააკრიტიკა, ერთმანეთში უნდა მოაგვარონ.

ამგვარად, მტკიცება, თითქოს გრენლანდია რუსეთის შემადგენლობაში გადავიდა, სიმართლეს არ შეესაბამება.