დეზინფორმაცია: ევროკავშირის ეთიკის კომისია შობის დღესასწაულის საჯარო ზეიმის აკრძალვას განიხილავს

სოციალურ ქსელში Facebook-ანგარიში პოსტს აქვეყნებს, რომლის მიხედვითაც, „ევროკავშირის ეთიკის კომისია განიხილავს საკითხს, 2026 წელს აიკრძალოს შობის დღესასწაულის საჯარო ზეიმი ევროკაშირის წევრი ქვეყნების იმ ქალაქებსა, თუ რეგიონებში სადაც მუსლიმი თემი კომპაქტურად სახლობს“ (დაარქივებული ბმული).

სინამდვილეში, ინფორმაცია იმის შესახებ, რომ ევროკომისია, მისი ეთიკის კომიტეტი ან ევროკავშირის რომელიმე ოფიციალური ორგანო ასეთ აკრძალვას გეგმავს, არ დასტურდება.

მსგავსი ინფორმაცია არც ერთ სანდო მედიასა თუ ღია წყაროში არ გავრცელებულა, მათ შორის არც ევროკავშირის ინსტიტუტების და თავად ევროკომისიის ოფიციალურ ვებგვერდზე.

დეზინფორმაციული შინაარსის პოსტები იმის შესახებ, რომ ევროკავშირი შობის აკრძალვას გეგმავდა, ჯერ კიდევ 2021 წელს, ევროკომისიის სახელმძღვანელო რეკომენდაციების გამოქვეყნებას მოჰყვა. რეკომენდაციების დოკუმენტის, რომლის სახელწოდებაა „თანასწორობის კავშირი-ევროკომისიის სახელმძღვანელო პრინციპები ინკლუზიური კომუნიკაციისთვის“, ავტორი თანასწორობის საკითხებში კომისარი, ჰელენა დალი იყო.

დოკუმენტი ევროკომისიის თანამშრომლებისთვის რეკომენდაციებს გასცემდა, რათა მათ თავიდან აერიდებინათ ისეთი ფრაზების გამოყენება, რომლებიც ნაკლებად ინკლუზიური იყო. დოკუმენტი არ კრძალავდა ქრისტიანული დღესასწაულების სახელების გამოყენებას, მაგალითად „შობა“, თუმცა მათ ნაცვლად ოფიციალური კომუნიკაციის დროს ნეიტრალური ფრაზების გამოყენების რეკომენდაციას გასცემდა. ამის მიზეზად, სახელმძღვანელოს მოჰყავდა შემდეგი არგუმენტი, რომ  ყველა ადამიანი ქრისტიანი არ არის, ან ყველა მათგანი ქრისტიანულ დღესასწაულებს ან არ, ან სხვადასხვა დღეს აღნიშნავს. რეკომენდაციის თანახმად, თანამშრომლებს უნდა გამოეყენებინათ ნეიტრალური ფრაზები, მაგალითად, უშუალოდ შობის მილოცვის ნაცვლად, ფრაზა „მათთვის, ვინც შობას აღნიშნავს“. ასევე, „შობის დროის“ გამოყენების ნაცვლად, ნეიტრალური ფრაზა „დღესასწაულების დრო“.

რაც შეეხება დოკუმენტის სამიზნე აუდიტორიას, დოკუმენტი შენიშნავდა, რომ „მოცემული რეკომენდაციები შეიძლება სასარგებლო იყოს ნებისმიერი ტიპის საკომუნიკაციო მასალის შესაქმნელად, მათ შორის პრეს-მასალებისთვის,  ინფოგრაფიკისთვის, სოციალური მედიისთვის განკუთვნილი პოსტებისა და ვიზუალური მასალისთვის, სასწავლო მასალებისა და პრეზენტაციებისთვის, შიდა კომუნიკაციაში გამოყენებული მასალებისთვის, გამოსვლებისა და ტექსტებისთვის, ბრიფინგებისთვის“.

შესაბამისად, დოკუმენტი არ იყო განკუთვნილი წევრი სახელმწიფოებისთვის, პოლიტიკოსებისთვის ან ევროკავშირში მცხოვრები პირებისთვის, არამედ იძლეოდა რეკომენდაციების სერიას იმის შესახებ, თუ როგორ უნდა ჰქონოდა კომუნიკაცია თანამშრომლებს კომისიის სახელით. აღსანიშნავია, რომ დოკუმენტი არც თანამშრომლებისთვის არ იყო სავალდებულო.

ჰელენა დალის მიერ შექმნილ სახელმძღვანელო დოკუმენტს კრიტიკა მას შემდეგ მოჰყვა, რაც  იტალიურმა ტაბლოიდურმა გამოცემამ „il Giornale“  სტატია გამოაქვეყნა, რომლის თანახმადაც, სახელმძღვანელო „შობის გაუქმების“ მცდელობას წარმოადგენდა. იმავე პოზიციაზე იყვნენ  მემარჯვენე პოლიტიკოსები, მათ შორის ევროპარლამენტის ყოფილი პრეზიდენტი ანტონიო ტაიანი. „ინკლუზია არ ნიშნავს [ევროკავშირის] ქრისტიანული ფესვების უარყოფას“, – დაწერა ტაიანიმ X-ზე.

კრიტიკის შემდეგ, დალიმ სახელმძღვანელოსთან დაკავშირებით განცხადება გამოაქვეყნა და მისი უკან გაწვევის გადაწყვეტილება მიიღო. განცხადების თანახმად, ინიციატივის მიზანი ევროპული კულტურის მრავალფეროვნების ილუსტრირება და ევროკომისიის ინკლუზიური ბუნების დემონსტრირება იყო. მიუხედავად ამისა, დალი აღნიშნავს, რომ სახელმძღვანელო ყველა სტანდარტს ვერ აკმაყოფილებდა, ამიტომ მისი უკან გაწვევის გადაწყვეტილება მიიღო: „ეს არ არის სრულყოფილი დოკუმენტი და არ აკმაყოფილებს კომისიის ყველა სტანდარტს. სახელმძღვანელო პრინციპებს აშკარად მეტი მუშაობა სჭირდება. ამიტომ, მე უკან ვიწვევ სახელმძღვანელო პრინციპებს და ამ დოკუმენტზე კიდევ უფრო მეტს ვიმუშავებ“.

ამდენად, პოსტში მოცემული მტკიცებები, თითქოს ევროკავშირი შობის საჯაროდ აღნიშვნას და მასთან დაკავშირებული სიმბოლიკის გამნოყენებას კრძალავს, არ დასტურდება.