დეზინფორმაცია: ვოლოდიმირ ზელენსკის მშობლები ისრაელში ვილას ყიდიან და მაიამიში გადასვლას გეგმავენ

სოციალურ ქსელში Facebook-ანგარიში „ნონა შარაბიძე“, რომლის მიერ გავრცელებული დეზინფორმაცია „ჯეოფაქტსს” არაერთხელ გადაუმოწმებია (1; 2; 3), ფოტოს ავრცელებს, რომელზეც უკრაინის პრეზიდენტის მშობლები ჩანან, ქვემოთ კი რუსული ტექსტია მოცემული. ფოტოს აღწერაში ტექსტი ქართულადაა თარგმნილი და ვკითხულობთ: „ზელენსკის მშობლებმა გადაწყვიტეს ისრაელში მდებარე ვილის გაყიდვა და მაიამიში გადასვლა.

«აქ ძალიან არასტაბილური სიტუაციაა და ჩვენ, როგორც მდიდარ ადამიანებს, შეგვიძლია ავირჩიოთ დედამიწის ნებისმიერ წერტილში ცხოვრება», – თქვა ოჯახის უფროსმა.“ სინამდვილეში, გავრცელებული ინფორმაცია ტყუილია (არქივირებული ბმული).

პირველ რიგში, აღსანიშნავია, რომ ზელენსკის მშობლების მიერ გაკეთებული მსგავსი შინაარსის განცხადება სანდო მედიასაშუალებების ვებგვერდებზე არ იძებნება. ციტატა არც  რუსულ მედიებს გაუვრცელებიათ. ციტატის Google-ის  სისტემაში ძიებისას, მხოლოდ სოციალური ქსელის ანგარიშებსა და გვერდების მიერ გავრცელებული მასალა გვხვდება.

საგულისხმოა, რომ წარსულში გავრცელდა ინფორმაცია, რომლის თანახმადაც 2023 წელს ზელენსკიმ მშობლებს სახლი აჩუქა ისრაელში, რომლის ფასიც 8 მილიონ დოლარს შეადგენდა.

მშობლებისთვის ისრაელში 8 მილიონ დოლარად სახლის შეძენასთან დაკავშირებით უცხოენოვან სოციალურ ქსელებში მტკიცება 2022 წლიდან ვრცელდება. მტკიცებას თან მოჰყვებოდა სახლის ფოტო, რომელზეც თითქოს ზელენსკის მიერ ისრაელში შეძენილი სახლი ჩანდა. ფოტოს ძიების ინსტრუმენტით (reverse image search) აღმოჩნდა, რომ ფოტოზე ნაჩვენები სახლი რეალურად კიევში მდებარეობს და მას Kyiv Sea Casa ჰქვია. 2022 და 2023 წელს აღნიშნული სახლი 15 მილიონ დოლარად იყიდებოდა, განცხადება კი უძრავი ქონების სააგენტო Sothebys Realty-ს ვებგვერდზე იძებნებოდა, თუმცა ამჟამად არც ღია წყაროებში და არც სააგენტოს ვებგვერდზე არ იძებნება ინფორმაცია გაიყიდა, თუ – არა სახლი.

ამდენად, სახლი, რომელიც ფოტოსურათზე ჩანდა და ზელენსკის ისრაელში შეძენილ ქონებად წარმოაჩენდნენ, რეალურად, კიევში მდებარეობს. დამატებით, ზელენსკის მშობლების ციტატის ნამდვილობა, რომლის თანახმადაც მათ მაიამიში გადასვლა სურთ, არ დასტურდება.