დეზინფორმაცია: მიხეილ ყაველაშვილი პირველია, ვინც გაეროს გენერალურ ასამბლეას ქართულად მიმართა

სოციალურ ქსელში Facebook-ანგარიში Xaxutaishvili Irma, რომლის მიერ გავრცელებული დეზინფორმაცია „ჯეოფაქტსს“ აქამდეც გადაუმოწმებია, პოსტს აქვეყნებს (დაარქივებული ბმული), რომლის მიხედვითაც, მიხეილ ყაველაშვილის გამოსვლის დროს გაეროს დარბაზში პირველად გაჟღერდა ქართული ენა: „იცოდით რომ, გაეროს დარბაზში პირველად გაჟღერდა ქართული ენა გუშინ ? მიუხედავათ იმისა რომ პრეზიდენტმა კარგად იცის ინგლისური“, – წერს Facebook-ანგარიში. სინამდვილეში, გაეროს გენერალურ ასამბლეაზე მიმართვა ქართულად,  მათ შორის, „ქართული ოცნების“ წარმომადგენლის მხრიდან, აქამდეც გაჟღერებულა.

მსგავსი პრეცედენტი 2018 წელს საქართველოს პრემიერ-მინისტრ მამუკა ბახტაძის გაეროში გამოსვლის დროს მოხდა. ბახტაძემ გენერალური ასამბლეის 73-ე სესიაზე სიტყვა ქართულ ენაზე წარმოთქვა.

ბახტაძემდე გაეროს გენერალურ ასამბლეას 1999 წელს ქართულ ენაზე მიმართა საქართველოს მეორე პრეზიდენტმა ედუარდ შევარდნაძემ.

ცნობისთვის, მიხეილ  ყაველაშვილი გაერო-ს გენერალური ასამბლეის მე-80 სესიაზე სიტყვით 25 სექტემბერს გამოვიდა და გენერალურ ასამბლეას ქართულად მიმართა. სიტყვით გამოსვლისას, მან შეაქო საქართველოს „პრაგმატული საგარეო პოლიტიკა“ და მხარი დაუჭირა „მრავალპოლუსიან საერთაშორისო წესრიგზე“ გადასვლას: „ჩვენ ვცხოვრობთ გარდამავალ ეპოქაში, სადაც ჯერ კიდევ ბუნდოვანია, თუ როგორი იქნება მომავალი საერთაშორისო წესრიგი. გაერთიანებულმა ერების ორგანიზაციამ, უნდა უზრუნველყოს ჩვენი პლანეტის ტრანზიცია, მშვიდობიან, სტაბილურ და სამართლიან, მრავალპოლუსიან საერთაშორისო წესრიგზე“. ყაველაშვილმა  „აფხაზ და ოს ძმებსა და დებსაც“ მიმართა: „ჩვენი ვალია, რომ ერთობლივი ძალისხმევით გადავლახოთ ხელოვნურად შექმნილი დაბრკოლებები, აღვადგინოთ ჩატეხილი ხიდები, წარსული წყენები კი, როგორც გამორჩეულად სულგრძელმა ხალხმა, წარსულს მივაბაროთ“.

ამდენად, გავრცელებული მტკიცება, რომ მიხეილ ყაველაშვილმა გაეროს გენერალურ ასამბლეაზე ქართულად გამოსვლისას  პირველად გააჟღერა ქართული ენა, სიმართლეს არ შეესაბამება.