არ დასტურდება, რომ საქართველოში ევროკავშირის ელჩი საპროტესტო აქციებზე დადიოდა
მოკლედ საკითხავი
სოციალურ ქსელში გავრცელებულ ვიდეოში ვხვდებით მტკიცებას, რომ საქართველოში ევროკავშირის ელჩი საპროტესტო აქციებზე დადიოდა.
ღია წყაროებში მსგავსი ინფორმაცია არ იძებნება და შესაბამისად არ დასტურდება
ქართულ ფეისბუქ სირვცეში გავრცელებულ ვიდეოში, გადაცემის სტუმარი აცხადებს, რომ ევროკავშირის ელჩი საქართველოში, ისევე როგორც წარსულში ევროკავშირის სხვა ქვეყნების ელჩები, საპროტესტო აქციას დაესწრო, და დასძენს, რომ მას არ მოსწონს მსგავსი საქციელი (დაარქივებული ბმული).
სტუმარი კონკრეტულ ევროკავშირის ელჩს არ ასახელებს; თუმცა, ბოლო წლებში საქართველოში განვითარებული პოლიტიკური მოვლენების კონტექსტიდან გამომდინარე, ნათელია, რომ ის, სავარაუდოდ, ევროკავშირის ამჟამინდელ ელჩზე, ბატონ პაველ ჰერჩინსკიზე საუბრობს. სწორედ ჰერჩინსკის უფლებამოსილების ვადის განმავლობაში მიმდინარეობდა საქართველოში ფართომასშტაბიანი და დრამატული საპროტესტო მოძრაობები, რომელთა დროსაც, გარკვეულ შემთხვევებში, ზოგიერთი ქვეყნბის ელჩი მართლაც შეუერთდა ან დაესწრო საპროტესტო აქციებს. ერთ-ერთი ასეთი შემთხვევის დროს, ლიეტუვის ელჩი საქართველოში, ბატონი ანდრიუს კალინდრა, დაესწრო თბილისში გამართულ დიდ საპროტესტო აქციას, როდესაც ლიეტუვის, ესტონეთისა და ისლანდიის საგარეო საქმეთა მინისტრები შეუერთდნენ და სიტყვით გამოვიდნენ აღნიშნულ აქციაზე.
არ იძებნება მტკიცებულება, რაც მიუთითებდა იმაზე, რომ ევროკავშირის ელჩი საქართველოში, ბატონი პაველ ჰერჩინსკი, ოდესმე დასწრებია ანტისამთავრობო ან ნებისმიერი სხვა სახის საპროტესტო აქციას საქართველოში. ღია წყაროებში ამის დადასტურება არ მოიპოვება. მსგავსი რამ რომ მომხდარიყო, ამას სავარაუდოდ ყველა წამყვანი ქართული მედიასაშუალება გააშუქებდა, რადგან ეს სენსაციური ახალი ამბავი იქნებოდა. ელჩი ჰერჩინსკი არაერთხელ ყოფილა საკმაოდ კრიტიკული საქართველოს მმართველი პარტიის მიმართ მათი პოლიტიკური გადაწყვეტილებებისა თუ სხვა ქმედებების გამო და თავისი მკაცრი მოსაზრებების გამო მათთან გარკვეული უთანხმოებებიც კი შეჰქმნია. მიუხედავად ამისა, მას ქუჩაში მათ წინააღმდეგ პროტესტი არასოდეს გამოუხატავს.
