დეზინფორმაცია: ტრამპის ადმინისტრაციამ ზელენსკის სასტუმროსა და სხვა მომსახურების ხარჯების დაფარვაზე უარი თქვა

სოციალურ ქსელში Facebook-გვერდი „Georgia First NEWS”, რომლის მიერ გავრცელებული დეზინფორმაცია „ჯეოფაქტსს“ წარსულშიც გადაუმოწმებია (1; 2), შემდეგ ინფორმაციას აქვეყნებს: „ტრამპის ადმინისტრაციამ ზელენსკის სასტუმროსა და სხვა მომსახურების ხარჯების დაფარვაზე უარი თქვა − ეს პირველი შემთხვევაა, როდესაც ამერიკის შეერთებულმა შტატებმა უცხო ქვეყნის დელეგაციის ხარჯების გადახდაზე უარი განაცხადა“. სინამდვილეში, გავრცელებული ინფორმაცია ტყუილია (არქივირებული ბმული).

აღნიშნული რუსულენოვან სოციალურ ქსელშიც ვირუსულად გავრცელებულ (1; 2; 3) ინფორმაციას ეფუძნება. რუსულენოვანი პოსტები წყაროდ  ამერიკული გამოცემა Wall Street Journal-ის სტატიის ფოტოანაბეჭდს უთითებდნენ. სტატიის სათაური შემდეგია: „Ukraine paid for its delegation’s visit and stay in the U.S. This is the first time the Trump administration has refused to cover the expenses of a foreign delegation“ – „უკრაინამ აშშ-ში თავისი დელეგაციის ვიზიტისა და ყოფნის ხარჯები თავად გადაიხადა. ეს არის პირველი შემთხვევა, როცა ტრამპის ადმინისტრაციამ უარი განაცხადა უცხოური დელეგაციის ხარჯების დაფარვაზე“.

პირველ რიგში, აღსანიშნავია, რომ Wall Street Journal-ის ვებგვერდზე ამ სათაურით სტატია არ იძებნება. ინფორმაცია არ იძებნება სხვა სანდო მედიასაშუალებების ვებგვერდებზეც.

საგულისხმოა, რომ ინფორმაცია X-ის ინგლისურენოვანმა ანგარიშებმაც გაავრცელეს, მათ შორის, ანგარიშმა @MyLordBebo, რომელიც ანტიუკრაინულ პოსტებსა და დეზინფორმაციას ხშირად ავრცელებს. მის პოსტზე თანდართულია საზოგადოებრივი შენიშვნა (Community Note), რომელიც ასევე აღნიშნავს, რომ ინფორმაცია ყალბია.

ინფორმაციას გამოეხმაურა BBC Verify-ს ჟურნალისტიც შაიან სარდარიზადეც, რომელმაც თავის X ანგარიშზე აღნიშნა, რომ WSJ-ის სტატიის ფოტოანაბეჭდი გაყალბებული იყო და WSJ-ს მსგავსი სტატია არ გამოუქვეყნებია. ჟურნალისტი პოსტში აღნიშნავს, რომ დეზინფორმაციის წყარო რუსული ტელეგრამია, კერძოდ, არხი, სახელად „VOZMЕЗДИЕ“, რომელმაც ინფორმაცია 2025 წლის 28 თებერვალს, თბილისის დროით, 23:59 საათზე გამოაქვეყნა.

ამგვარად, გავრცელებული ინფორმაცია, რომლის თანახმადაც ტრამპის ადმინისტრაციამ ზელენსკის სასტუმროსა და სხვა მომსახურების ხარჯების დაფარვაზე უარი თქვა, რაც პირველი შემთხვევაა, როდესაც ამერიკის შეერთებულმა შტატებმა უცხო ქვეყნის დელეგაციის ხარჯების გადახდაზე უარი განაცხადა, მცდარია. აღნიშნული მტკიცება მხოლოდ რუსული პროპაგანდისტული ტელეგრამ არხის მიერ გავრცელებულ პოსტში ფიგურირებს, რომელიც, თავის მხრივ,  ამერიკული გამოცემის Wall Street Journal-ის სტატიის გაყალბებულ ფოტოანაბეჭდს ეფუძნება.