სოციალურ ქსელში კრიშტიანუ რონალდუს ყალბი ფოტო ვრცელდება

სოციალურ ქსელში ვრცელდება კრიშტიანუ რონალდუს ფოტო, რომელშიც მას ზურგზე პალესტინის მხარდასაჭერი ტატუაჟი აქვს. კერძოდ, ფოტოზე ჩანს, რომ რონალდუმ ტატუდ პალესტინის დროშა და მხარდასაჭერი სიმბოლური ფრაზა „თავისუფლება პალესტინას“ დაახატინა. რეალურად, ფოტოს ავთენტურობა არ დასტურდება და კრიშტიანუ რონალდუს არათუ პალესტინის მხარდასაჭერი, არამედ ზოგადად ტატუ არ აქვს.

პირველ რიგში, აღსანიშნავია, რომ კრიშტიანუ რონალდუს მიერ პალესტინის მხარდაჭერის შესახებ მცდარი ინფორმაცია უცხოენოვან მედიაში არაერთხელ გავრცელებულა. მაგალითად, ერთ-ერთი პოსტის მიხედვით, გამოქვეყნდა ვიდეო სათაურით: „კრიშტიანუ რონალდუ სრულად უჭერს მხარს პალესტინას“. რეალური ვიდეო კი 2016 წლის 23 დეკემბერს გავრცელდა რონალდუს ოფიციალურ Facebook-გვერდზე შემდეგი სათაურით: „იმედიანი გზავნილი სირიის კონფლიქტის შედეგად დაზარალებულ ბავშვებს. @SavetheChildren.“. გავრცელდა ასევე ვიდეო, თითქოს რონალდუმ მატჩის შემდეგ სტადიონზე პალესტინის დროშა გაშალა. რეალურად, მოედანზე მყოფი ფეხბურთელი პალესტინის დროშით არა რონალდუ, არამედ მაროკოელი ჯავად ალ იაკიმი იყო.

კრიშტიანუ რონალდუს ტატუაჟიანი ფოტო არაერთ უცხოენოვან და ქართულენოვან სოციალურ პლატფორმაზე გავრცელდა (1, 2, 3, 4).

სინამდვილეში, ფოტო სავარაუდოდ ხელოვნური ინტელექტის საშუალებითაა გენერირებული და რეალობას არ შეესაბამება. კრიშტიანუ რონალდუ საზოგადოებაში ფილანთროპის სახელით სარგებლობს და ჯერ კიდევ 2012 წელს მან ერთ-ერთ იტალიურ მედიასთან ინტერვიუში განაცხადა: „არ მაქვს ტატუები, რათა სისხლის დონაცია უფრო ხშირად შევძლო“. გარდა ამისა, არც ერთ სანდო მედიასა თუ ღია წყაროში არ დასტურდება, რომ კრიშტიანუ რონალდუმ ღია მხარდაჭერა გამოუცხადა პალესტინას, რაც, ექსკლუზიური შინაარსიდან გამომდინარე, აუცილებლად გაშუქდებოდა. ამასთანავე, აღნიშნულ ან მსგავს ფოტოს ან/და მხარდაჭერის დამადასტურებელ პოსტს ვერ ვხვდებით ვერც კრიშტიანუ რონალდუს ოფიციალურ Instagram-გვერდზე, რომელზეც სპორტსმენი საკმაოდ აქტიურად აქვეყნებს ფოტოებს.  შესაბამისად, კრიშტიანუ რონალდუს ტატუ წარწერით „თავისუფლება პალესტინას“ და პალესტინის დროშის გამოსახულება ზურგზე, არ დასტურდება.