დეზინფორმაცია: მარნეულში „ერთიანი ნაციონალური მოძრაობის“ წევრები საარჩევნო ყუთში ბიულეტენებს ყრიან

Facebook-ანგარიშმა „ფანტი ნა“-მ, რომელიც დეზინფორმაციის გავრცელებაში აქამდეც არის შემჩნეული, გაავრცელა მარნეულის 69-ე უბანზე მომხდარი დარღვევის ვიდეო შემდეგი აღწერით: „მარნეულში ნაცების აზერები დდააგიჟდნენ ამ ჯერზეც“.

სოციალურ ქსელში გავრცელდა კადრები მარნეულის 69-ე საარჩევნო უბნიდან, სადაც ჩანს, რომ ერთ-ერთი პირი საარჩევნო ყუთში ბიულეტენებს ყრის. ამჟამად, მარნეულის #69 საარჩევნო უბანზე კენჭისყრა შეწყდა და შედეგები ბათილად გამოცხადდა. გადაწყვეტილება საოლქო კომისიამ მიიღო. შინაგან საქმეთა სამინისტრომ გამოძიება სისხლის სამართლის კოდექსის 164-ე (3) (არჩევნების გაყალბების) მუხლით დაიწყო. ცესკოს თავმჯდომარის, გიორგი კალანდარიშვილის, განცხადებით ეს ფაქტი „იზოლირებულ შემთხვევას“ წარმოადგენს.

რეალურად, მტკიცება, რომ გავრცელებულ ვიდეოში „ერთიანი ნაციონალური მოძრაობის“ წარმომადგენლები ფიგურირებენ, ფაქტობრივ საფუძველს მოკლებულია და არ დასტურდება.

Facebook-ანგარიში არანაირ მტკიცებულებას, არგუმენტს ან ფაქტს არ ასახელებს, თუ ვინ არის ვიდეოში „ერთიანი ნაციონალური მოძრაობის“ წარმომადგენელი ან რაზე დაფუძნებით აკეთებს აღნიშნულ მტკიცებას.

შემთხვევას გამოეხმაურა „ქართული ოცნების“ აღმასრულებელი მდივანი, მამუკა მდინარაძე. მისი მტკიცებით, დამკვირვებელზე თავდასხმა და ურნაში ბიულეტენების ჩაყრა „სპეციალურად გაკეთებულია“. მისი თქმით: „სქემა იყო ასეთი, რომ უნდა მოესყიდათ, მოეძებნათ ვინმე „ქართული ოცნების“ რიგებში, ვისაც გადაუხდიდნენ ფულს, რომელიც შემდეგ სხვას დაარწმუნებდა ან თვითონ გააკეთებდა ამას – ჩაყრიდა ან შეაცურებდა ბიულეტენებს საარჩევნო ურნაში, ან ელექტრონულ აპარატში“. თუმცა მისი ინფორმაციით, ბიულეტენები „ქართული ოცნების“ დეპუტატმა ჩაყარა: „წარმოუდგენელია, რომ კამერების წინ დადგეს ადამიანი და ასე ყრიდეს ბიულეტენებს ურნაში. ეს არის სპეციალურად გაკეთებული და თუ ეს კადრები ნამდვილია და ახალია, იქ საარჩევნო უბანზე ამ ყველაფერში მონაწილეობას იღებს „ქართული ოცნების“ დეპუტატი და ჩვენი ღრმა რწმენით, ის მონაწილეობას იღებს ქვეყნის არევის გეგმაში, რომ ეს კადრები გავრცელდეს და შემდეგ ლეგიტიმაციის პრობლემები იყოს“.

შესაბამისად, მამუკა მდინარაძეც ადასტურებს, რომ ვიდეოში „ქართული ოცნების“ წარმომადგენელი ფიგურირებს და არა – „ერთიანი ნაციონალური მოძრაობის“ (ის ასევე მიუთითებს, რომ ის, სავარაუდოდ, „ნაციონალურმა მოძრაობამ“ მოისყიდა, თუმცა ეს ინფორმაცია გადამოწმებული ან დადასტურებული არ არის).