ტალსი გაბარდი თანამდებობიდან იძულებით და დემონსტრაციულად არ გაუთავისუფლებიათ

მოკლედ საკითხავი

ქართულ ფეისბუქ სივრცეში გავრცელებული ვიდეოს ავტორის მტკიცებით, აშშ-ის ეროვნული დაზვერვის ხელმძღვანელი, ტალსი გაბარდი, თანამდებობიდან იძულებით და დემონსტრაციულად გაათავისუფლეს.

გაბარდმა გადადგომის შესახებ განცხადება თავად დაწერა და მიზეზად ის დაასახელა, რომ მის მეუღლეს ძვლის კიბო დაუდგინდა.

ქართულ ფეისბუქ სივრცეში გავრცელებულდა მტკიცება, რომ აშშ-ის ეროვნული დაზვერვის ხელმძღვანელი, ტალსი გაბარდი, თანამდებობიდან იძულებით და დემონსტრაციულად გაათავისუფლეს, რადგან ის ერთადერთი უმაღლესი თანამდებობის პირი იყო, რომელიც მზად იყო დაემსხვრია სისტემური ტაბუ და ესაუბრა წინააღმდეგობრივ საკითხებზე, როგორიც იყო კოვიდ 19-ის რეალური საწყისები, საარჩევნო მანიპულაციები და უკრაინაში პენტაგონის საიდუმლო ბიო-პროგრამები (დაარქივებული ბმული).

ტალსი გაბარდის გადადგომის შესახებ ინფორმაცია 2026 წლის 22 მაისს გავრცელდა. მისი გადადგომა 30 ივნიის შევა ძალაში. ავტორიტეტული საერთაშორისო მედიის ცნობით, გაბარდის გადადგომის შესახებ გადაწყვეტილება უკავშირდებოდა მისი მეუღლის, აბრაამის დიაგნოზს, რომელსაც ძვლის კიბო დაუდგინდა. Fox News-მა გაბარდის წერილიც გამოაქვეყნა, სადაც ის სწორედ ამ საკითხზე საუბრობს და პრეზიდენტ დონალდ ტრამპს მადლობას უხდის წარსულში მის მიმართ გამოჩენილი ნდობისთვის.

გაბარდის სიტყვებით, მას ყოველთვის ჰქონდა მეუღლის, აბრაამის მხარდაჭერა მათი ქორწინების 11 წლის განმავლობაში და არსებული სიტუაციის გათვალისწინებით, მას არ სურს მარტო დატოვოს მეუღლე დაავადებასთან ბრძოლაში, რასაც, მისი აზრით, დაკავებულ თანამდებობაზე დარჩენა აიძულებდა.

გაბარდის განცხადებას მალევე უპასუხა პრეზიდენტმა დონალდ ტრამპმა. Truth Social-ზე გამოქვეყნებულ განცხადებაში, მან ტალსი გაბარდს მადლობა გადაუხადა წარმატებული საქმიანობისთვის და მის მეუღლეს სწრაფი გამოჯანმრთელება უსურვა.

შესაბამისად, უსაფუძვლოა მტკიცება, რომ ტალსი გაბარდი თანამდებობიდან იძულებით და დემონტრაციულად გაათავისუფლეს.