მტკიცება, რომ გიორგი გახარიამ ფეხბურთელებისთვის ღირსების ორდენების ჩამორთმევა მოითხოვა, ყალბია

სოციალურ ქსელში Facebook-ანგარიშმა „ქვეყნის მტრები“ გაავრცელა ყალბი საინფორმაციო ბარათი, რომელზეც დატანილია მტკიცება, რომ გიორგი გახარია საქართველოს საფეხბურთო ნაკრების ფეხბურთელებისთვის ღირსების ორდენების ჩამორთმევას ითხოვს. აღსანიშნავია, რომ ბარათი „მთავარი არხის“ დიზაინითაა შექმნილი და მასზე ტელეარხის ლოგოა დატანილი, რაც ქმნის მცდარ შთაბეჭდილებას, რომ ეს ინფორმაცია მედიასაშუალებამ გაავრცელა (იხილეთ დაარქივებული პოსტი). ყალბი ამბის მსგავსი მედიასაშუალების დიზაინით გავრცელება მიზნად ისახავს, მკითხველს გავრცელებული ინფორმაციისადმი მეტი სანდოობა გაუჩინოს და შესაბამისად, მის განწყობებსა და შეხედულებებზე უფრო მარტივად იმოქმედოს.

ცნობისთვის, Facebook-გვერდის „ქვეყნის მტრები“ მიერ გამოქვეყნებული ინფორმაცია, რომელიც შინაარსობრივად ოპოზიციის დისკრედიტაციას ისახავს მიზნად „ჯეოფაქტს“ აქამდეც გადაუმოწმებია (იხილეთ სტატია).

პოსტის გამოქვეყნება საქართველოს საფეხბურთო ნაკრების ალბანეთთან ანგარიშით 1:0-ით დამარცხებას მოჰყვა. რაც იმაზე მიუთითებს, რომ აღნიშნული Facebook-გვერდი ოპოზიციური აქტორების დისკრედიტაციისთვის საქართველოში მიმდინარე მოვლენების გამოყენებას აქტიურად ცდილობს.

სინამდვილეში სანდო, ოფიციალური ან ავთენტური წყარო, რომელიც დაადასტურებდა, რომ აღნიშნულ ციტატა ნამდვილად გიორგი გახარიას ეკუთვნის არ არსებობს. კერძოდ, აღნიშნული ციტატა არ გვხვდება არც გიორგი გახარიას ოფიციალურ Facebook-ანგარიშზე „გახარია“ და არც პოლიტიკური პარტიის „საქართველოსთვის“ სოციალური ქსელების ანგარიშებსა და ვებგვერდზე. ინფორმაცია არ იძებნება არც მედიასაშუალებებში, მათ შორის, ტელეკომპანია „მთავარის“ Facebook ან Instagram-ანგარიშებზე.

აღსანიშნავია ისიც, რომ „მთავარი არხი“ ბარათებზე ციტატების დატანისას ბრჭყალების ნიშნებს იყენებს (‘’), განსხვავებულია ტექსტის შრიფტიც (იხილეთ ფოტო ქვემოთ).

ბარათი მთავრი არხის ანგარიშიდან და სოციალურ ქსელში გამოქვეყნებული ყალბი ბარათი

უფრო მეტიც, თამაშის დაწყებამდე გიორგი გახარიას Facebook-ანგარიშზე გამოქვეყნებულ ვიდეოში, სადაც ტელეკომპანია „ფორმულაში“ მისი ვიზიტის მონაკვეთი ჩანს, ის ამბობს „მე მინდა ჩვენს ნაკრებს ვუსურვო გამარჯვება, წარმატება და მინდა იცოდეთ, რომ მთავარი არის ღირსეულად დავიცვათ ჩვენი ქვეყნის ინტერესები და ხან ფრე იქნება, ხან დავმარცხდებით, ხან კიდე გავიმარჯვებთ, მთავარია წინ მივდიოდეთ“. ამდენად თამაშის დაწყებამდე გიორგი გახარია თავად ამახვილებდა ყურადღებას იმაზე, რომ მთავარი ღირსეულად თამაში და პროგრესის ჩვენებაა, რა დროსაც გამარჯვებების გარდა ფრის ან მარცხის დაფიქსირებაც შესაძლებელია.

ამდენად მტკიცება, რომ გიორგი გახარიამ საქართველოს საფეხბურთო ნაკრების მოთამაშეებისთვის ღირსების ორდენების ჩამორთმევა მოითხოვა, ტყუილია.