სოციალურ ქსელში აშშ-ის ელჩ რობინ ლ. დანიგანის შესახებ დეზინფორმაცია ვრცელდება
სოციალურ ქსელში Facebook-მომხმარებელი ავრცელებს ელჩ რობინ ლ. დანიგანის ფოტოს (დაარქივებული ბმული) სათაურით: „შეგახსენებთ, რომ მანამდე უკრაინაში იყო ელჩი და ომის წამოწყებაში ამის ლომის წვლილია“. რეალურად, რობინ ლ. დანიგანი უკრაინაში სრულუფლებიანი ელჩი არასდროს ყოფილა, ომი კი რუსეთმა წამოიწყო.
რობინ ლ. დანიგანი ამერიკის შეერთებულ შტატების საგანგებო და სრულუფლებიანი ელჩია საქართველოში. მანამდე ის ევროპული და ევრაზიული საქმეების აღმოსავლეთ ევროპის ბიუროში სახელმწიფო მდივნის მოადგილის თანამდებობას იკავებდა. ამ უკანასკნელის მისიას ევრაზიასა და ევროპაში უსაფრთხოების, ადამიანის უფლებების, ეკონომიკური კეთილდღეობისა თუ სამოქალაქო საზოგადოებასთან კოორდინაციის ჭრილში აშშ-ის ინტერესების გატარება წარმოადგენს.
ელჩი დანიგანი სახელმწიფო დეპარტამენტს 1992 წელს შეუერთდა, როგორც მინისტრ-მრჩევლის რანგის კარიერული დიპლომატი და დღემდე სხვადასხვა თანამდებობას იკავებდა. 2014-2017 წლებში მსახურობდა სახელმწიფო დეპარტამენტის ენერგორესურსების ბიუროში მდივნის თანაშემწის მოადგილედ. ბიუროს საქმიანობა მოიცავს სახელმწიფო დეპარტამენტის მცდელობებს, შეიმუშაოს და განახორციელოს საერთაშორისო ენერგეტიკული პოლიტიკა დიპლომატიური ჩართულობის გზით, რაც ხელს შეუწყობს მავნე გამოსხივებების შემცირებას, ენერგეტიკულ უსაფრთხოებას პარტნიორებს შორს, ეკონომიკურ კეთილდღეობასა და ენერგიაზე საიმედო წვდომას.
ამასთანავე, ელჩის მოვალეობის შემსრულებლად და მისიის ხელმძღვანელის მოადგილედ მსახურობდა აშშ-ის საელჩოში ავსტრიაში 2018-2021 წლებში. ელჩი დანიგანი აგრეთვე მუშაობდა ახლო აღმოსავლეთის საქმეთა ბიუროში, სახელმწიფო მდივნის ოფისში, მსახურობდა აშშ-ის საელჩოებში თურქეთში, ვიეტნამში, ჩილეში, კუბასა და ელ სალვადორში. თუმცა რობინ ლ. დანიგანს არასდროს უმსახურია უკრაინაში არათუ ელჩად, არამედ ზოგადად საელჩოში.
მტკიცების მიხედვით, უკრაინაში ომის დაწყებაში ელჩ დანიგანს ლომის წვლილი მიუძღვის, რაც მცდარია. სინამდვილეში, უკრაინაში 2022 წლის 24 თებერვალს სრულმასშტაბიანი ომი რუსეთმა დაიწყო, როდესაც რუსულ ჯარებს უკრაინის საზღვრის გადალახვა უბრძანა. შეჭრამდე, რუსეთმა უკრაინის საზღვართან 100 ათასზე მეტი ჯარისკაცი და სხვადასხვა საომარი რესურსი გადასხა. აღნიშნული პროცესი ჯერ კიდევ 2021 წლის გაზაფხულზე დაიწყო, როდესაც რუსეთმა უკრაინის საზღვართან 10 ათასობით ჯარისკაცი განალაგა. ამავე წლის ნოემბრიდან უკვე დამატებითი ძალების გადასხმა იყო დაწყებული და საბოლოოდ, 23 თებერვლის მონაცემებით, უკრაინის საზღვართან 190 ათასი რუსი ჯარისკაცი იყო განლაგებული (იხილეთ რუკები და სატელიტიდან გადაღებული სურათები).
რუსეთის პრეზიდენტის პუტინის თანახმად, რუსეთი უკრაინაში საკუთარ საზღვრებთან NATO-ს გაფართოების თავიდან ასაცილებლად „სპეციალურ სამხედრო ოპერაციას“ აწარმოებს, რამდენადაც 2008 წელს NATO-ს წევრ-სახელმწიფოებმა მიიღეს გადაწყვეტილება, რომ უკრაინა საბოლოოდ, სამხედრო ალიანსის წევრი გახდებოდა.
უკრაინაში საომარი ოპერაციების წამოწყებაში აშშ-ის, ან ზოგადად დასავლეთის დადანაშაულება კრემლის პროპაგანდის მნიშვნელოვანი ნაწილია. მაგალითად, ომის დაწყების დღიდან კრემლის პროპაგანდა აქტიურად ავრცელებს დეზინფორმაციას, რომ ომის დაწყება დასავლეთის ბრალია და „უკრაინა მძევალია კიევის რეჟიმისა და მისი დასავლელი ბატონებისა, რომელთაც ეფექტურად მოახდინეს ქვეყნის ოკუპაცია“. ის ნარატივებიც, რომ პუტინმა უკრაინაში სრულმასშტაბიანი ომი NATO-ს გაფართოების გამო დაიწყო და/ან რომ აშშ-ს ომის დაწყებაში დიდი წვლილი მიუძღვის, აღნიშნული პროპაგანდის ნაწილია. რეალურად, რუსეთის მიერ სამხედრო მობილიზაციისა და ძალების კონცენტრაციის საპასუხოდ, დასავლეთმა მოსკოვს დეესკალაციისთვის არაერთი ვარიანტი შესთავაზა.
ამერიკის შეერთებულმა შტატებმა მოსკოვს კრიზისის დიპლომატიური გზებით მოგვარება ასევე არაერთხელ და არაერთ ფორმატში შესთავაზა. გარდა ამისა, ევროპის ლიდერებიც ესკალაციის თავიდან ასაცილებლად რუსეთთან მოლაპარაკებებს ცდილობდნენ. მაგალითად, 2022 წლის 7 თებერვალს საფრანგეთის პრეზიდენტი ემანუელ მაკრონიც პრეზიდენტ პუტინს ესაუბრა, 15 თებერვალს – გერმანიის კანცლერი ოლაფ შოლცი, ხოლო დიდი ბრიტანეთის საგარეო საქმეთა მინისტრი ლიზ ტრასი 10 თებერვალს სერგეი ლავროვს შეხვდა. ამასთანავე, ჯერ კიდევ 2021 წლის 7 დეკემბერს რუსეთისა და აშშ-ის პრეზიდენტებს შორის სატელეფონო საუბარი გაიმართა. მანამდე, ენტონი ბლინკენის თქმით, სტრატეგიული სტაბილურობის დიალოგის საშუალებით, ნატოში და ასევე ეუთოში, რუსეთის ფედერაციის საბჭოსთან დიპლომატიური ჩართულობის ინტენსიური სერია გაიმართა
დასავლეთის მხრიდან კრიზისის მშვიდობიანი გზით მოგვარების მცდელობის მიუხედავად, რუსეთის ფედერაციამ 2022 წლის 24 თებერვალს სრულმასშტაბიანი ომი დაიწყო.
ამრიგად, პოსტში გამოთქმული მტკიცებები ყალბია.
