პატრიარქ შიო III-ს რუსეთის პრეზიდენტისთვის დაბადების დღე არ მიულოცია
მოკლედ საკითხავი
ქართულ ფეისბუქ სივრცეში გავრცელებული ინფორმაციის თანახმად, საქართველოს კათალიკოს პატრიარქმა, შიო III-მ რუსეთის პრეზიდენტს, ვლადიმირ პუტინს, დაბადების დღე მიულოცა.
ღია წყაროებში, მათ შორის არც ქართულ და რუსულ მედიაში მსგავსი ინფორმაცია არ იძებნება.
ქართულ ფეისბუქ სივრცეში გავრცელდა პოსტი, რომლის თანახმადაც საქართველოს კათალიკოს პატრიარქმა, შიო III-მ რუსეთის პრეზიდენტს, ვლადიმირ პუტინს, დაბადების დღე მიულოცა (დაარქივებული ბმული). თავად პოსტში ავტორი არ ასახელებს წყაროს, თუ საიდან აქვს ინფორმაცია. თუმცა პოსტის პირველივე კომენტარად ვხედავთ ავტორის განმარტებას, რომ მან ეს მილოცვა სოციალურ ქსელ ტვიტერზე (ამჟამად X) ნახა, მაგრამ იმის გამო, რომ "ტელეფონი არ უვარგა" მილოცვის ბმულს ვერ დადებს. კომენტარიდან ასევე აშკარაა, რომ ავტორი ამ ამბავს მიესალმება.
რუსეთის პრეზიდენტის, ვლადიმირ პუტინის დაბადების დღე 7 ოქტომბერია. სწორედ ამ დღეს გავრცელდა ჩვენ მიერ განხილული ფეისბუქ პოსტი.
პოსტში არსებული მტკიცება არ დასტურდება ღია წყაროებით. მსგავსი ინფორმაციის ძიება არც ქართულ და არც რუსულ ენაზე არ გვაძლევს დასტურს, რომ მსგავსი მილოცვა მართლაც გავრცელდა. ორივე შემთხვევაში გვხვდება სიახლეები, რომელთა მიხედვითაც პუტინს დაბადების დღე რუსეთის პატრიარქმა კირილმა მიულოცა. აღნიშნული ინფორმაცია არ დასტურდება არც საპატრიარქოს ოფიციალურ ვებგვერდზე (ბმული 1, 2, არქივი) და Facebook-გვერდზე (საპატრიარქოს გვერდზე 7 ოქტომბერს გამოქვეყნებული სიახლე საერთოდ არ იძებნება, საპატრიარქოს 4 და 8 ოქტომბერს აქვს სიახლე გამოქვეყნებული - ბმული 1, 2).
რუსეთის და საქართველოს ურთიერთობოს დინამიკიდან და საკითხის სენსიტიურობიდან გამომდინარე, პატრიარქ შიო მესამე მართლაც რომ მიელოცა დაბადების დღე ვლადიმირ პუტინისთვის, მოსალოდნელია, რომ ეს ფართოდ გაშუქდებოდა ქართული მედიის მიერ. ასევე დიდია ალბათობა, რომ საკითხს გააშუქებდა და პროპაგანდისტული მიზნებით გამოიყენებდა რუსეთის სამთავრობო მედიაც. ამდენად, სოციალურ ქსელში გავრცელებული ამბის ნამდვილობა არ დასტურდება.
მსგავსი ინფორმაცია არ იძებნება არც X-ზე. აღნიშნულ სოციალურ ქსელში საქართველოს საპატრიარქოს ან პატრიარქთან დაკავშირებული ოფიციალური არხი არ იძებნება.
