სოციალურ ქსელში ნანუკა ჟორჟოლიანის ვიდეო მანიპულირებულად ვრცელდება
სოციალურ ქსელში Facebook-მომხმარებელი ავრცელებს ვიდეოს (დაარქივებული ბმული), რომელშიც ჟურნალისტ ნანუკა ჟორჟოლიანის მიმართვაა ასახული. ვიდეოში ნანუკა ჟორჟოლიანი ამბობს: „37 წელი, არა ხალხო, თქვენ არ იცით 37 წელში რა ხდებოდა. ანუ, რა ხდებოდა, რომ ვიცოდე? რა ხდებოდა, რომ ვიცოდე?!“. ვიდეო-პოსტს სათაურად გასდევს: „მართლა რა დებილია!“ რეალურად, ნანუკა ჟორჟოლიანის მიმართვა კონტექსტის გარეშეა მოჭრილია და მცდარად ქმნის შთაბეჭდილებას, თითქოს ჟორჟოლიანი ამბობს, რომ 1937 მასობრივი რეპრესიების შესახებ არაფერი იცის.
ჟურნალისტმა ნანუკა ჟორჟოლიანმა 29 აპრილს საკუთარ Facebook-ანგარიშზე გაავრცელა ვიდეო-მიმართვა სათაურით: „მარიამის სახლშიც შევიდნენ. ოღონდ იქ ჩემი ძმა, რძალი და მცირეწლოვანი შვილი ცხოვრობენ. ტელეფონები გამოურთეს. არ უშვებენ არც მარიამს, არც ადვოკატს“.
2025 წლის 29 აპრილს „ნანუკას ფონდის“ დამფუძნებლისა და ჟურნალისტის ნანუკა ჟორჟოლიანის სახლში პროკურატურის წარმომადგენლებმა ჩხრეკა ჩაატარეს. პროკურატურის თანამშრომლები ჟურნალისტის სახლში 7 საათის განმავლობაში იმყოფებოდნენ. ჟორჟოლიანის ბინაში ჩხრეკის პარალელურად პროკურატურის თანამშრომლები შევიდნენ მისი შვილის, აქტივისტ მარიამ გეგუჩაძის ბინაშიც.
პირდაპირი ეთერის სახით საკუთარ ანგარიშზე გავრცელებულ ვიდეოში ჟურნალისტი სწორედ აღნიშნულ ფაქტს განიხილავს და ამბობს, რომ პროკურატურა შესულია მისი შვილის სახელზე გაფორმებულ ბინაში, რომელშიც ჟურნალისტის ძმის ოჯახი ცხოვრობს. ამას გარდა, ვიდეოში ჟორჟოლიანი განიხილავს რამდენიმე სავარაუდო დარღვევას, რომელსაც ჩხრეკის დროს ჰქონდა ადგილი. მისი თქმით, მარიამის ბინაში არ უშვებდნენ ადვოკატს, ძმასა და რძალს გამოურთეს ტელეფონები და უცნობია, შიგნით რა ხდებოდა, ბინაში არ უშვებდნენ არც მარიამ გეგუჩაძეს, ვის გამოც, მისი თქმით, ტარდებოდა ჩხრეკა.
ჟურნალისტი ამბობს: „თვით „ქართული ოცნების“ პირობებშიც კი არის სიგიჟე, რაც ახლა ხდება, რომ ადამიანის სახლს ჩხრეკდე და მას არ უშვებდე, და არ უშვებდე მის ადვოკატს და თან ოჯახის სხვა წევრებთან ერთად აკეთებდე ამას, ურთავდე ტელეფონებს. ანუ, წარმოუდგენელი სიგიჟეა ეს. თვით „ქართული ოცნებისთვისაც“ კი ეს არის წარმოუდგენელი სიგიჟე. მაშინ, როდესაც მარიამის სახლს ჩხრეკენ, პარალელურად ჩემს სახლში არის პროკურატურა და ხდება (sic) ჩემი სახლის ჩხრეკა. და აქ რაღაცა სადავო იყო ცოტა ხნის წინ, რომ 37 წელი…“არა, ხალხო, თქვენ არ იცით 37 წელში რა ხდებოდა“. ანუ, რა ხდებოდა, რომ ვიცოდე? რა ხდებოდა, რომ ვიცოდე? დედა-შვილს, ოჯახის წევრებს ერთად ჩხრეკდნენ პარალელურად? ჩემი საქმიანობის პარალელურად რომ ჩემი შვილის სახლს ჩხრეკენ, მინდა, რომ რაღაცნაირ ადამიანებს ვკითხო, რომ მაქვს უფლება, რომ ვიფიქრო, რომ ერთ ადგილას ვართ? და ბელორუსიაც (sic) აღარ არის უკვე ეს? ანუ, ამის უფლება თუ მაქვს, რომ ვიფიქრო, როდესაც, კიდევ ერთხელ ვამბობ, დედა-შვილის სახლს პარალელურად ჩხრეკენ. ანუ, ჩემი სახლი – აქეთ, მარიამის სახლი იქით იჩხრიკება. და თან კიდევ, ყველაზე მთავარი არის ის, რომ მარიამს სახლში არ უშვებენ, ადვოკატს სახლში არ უშვებენ“.
სოციალურ ქსელში მანიპულირებულად გავრცელებული ვიდეო სათაურთან მცდარ შთაბეჭდილებას ქმნის, თითქოს ნანუკა ჟორჟოლიანი ვიდეოში უცოდინარობის გამო საზოგადოებას ეკითხება, თუ რა მოხდა 1937 წელს. რეალურად კი, ჟურნალისტი მისი და მისი შვილის სახლის ერთდროულ ჩხრეკას 1937 წლის მასობრივ რეპრესიებს ადარებს და ამ კონტექსტში სვამს რიტორიკულ შეკითხვას.
