სოციალურ ქსელში თომას როკერმანის ვიდეო ყალბი თარგმანით ვრცელდება

სოციალურ ქსელში გავრცელდა გერმანელი პოლიტიკოსის, პარტია "ალტერნატივა გერმანიისთვის" თომას როკერმანის ვიდეო (ბმული 1, 2, არქივირებული ბმული 1, 2), რომელშიც ის გერმანიის კანცლერს მიმართავს და მას მოღალატეს უწოდებს, ადანაშაულებს ამერიკისა და კომპანია "ბლექროკის" დავალებების შესრულებაში გერმანიის მოსახლეობის საწინააღმდეგოდ. ვიდეოში არსებული თარგმანის მიხედვით, როკერმანი ასევე უხამსი სიტყვებით მიმართავს ევროკომისიის პრეზიდენტს, მანამდე გერმანიის თავდაცვის მინისტრს, ურსულა ფონ დერ ლაიენს. იდენტური ვიდეო რუსულენოვანმა ანგარიშებმაც გაავრცელეს (ბმული 1, 2, 3, არქივი 1, 2).

აღსანიშნავია, რომ ეს არ არის პირველი შემთხვევა, როდესაც პარტია "ალტერნატივა გერმანიისთვის" პოლიტიკოსების სახელით ყალბი თარგმანის შემცველი ვიდეოები ვრცელდება. გასულ თვეებში "ჯეოფაქტსმა" იდენტური ტაქტიქით გავრცელებული მასალები გამოააშკარავა პარტიის ლიდერის ალის ვაიდელის და სვენ ტრიტშლერის შემთხვევაშიც (ბმული 1, 2, 3).

თომას როკერმანის აღნიშნული გამოსვლის საძიებლად "ჯეოფაქტსმა" YouTube-ზე პარტიის ოფიციალური გვერდი გადაამოწმა, სადაც პარტიის წარმომადგენლების ვიდეოები იდენტური ვიზუალით, მარჯვენა ზედა კუთხეში პარტიის ლოგოთი ქვეყნდება. აღნიშნულ გვერდზე Thomas Röckemann-ის სახელის ძიებით რამდენიმე ვიდეო ჩნდება, მათ შორისაა, 2026 წლის 9 ივლისს გამოქვეყნებული, რომელშიც პოლიტიკოსის ტანსაცმელი და უკანა ფონი ემთხვევა სოციალურ ქსელში რუსული თარგმანით გავრცელებულ ვიდეოს (არქივი). ვიდეოს აღწერით ირკვევა, რომ პოლიტიკოსი გერმანიის ჩრდილოეთ რაინ-ვესტფალიის მიწის პარლამენტში გამოდის და იმ ემიგრანტებზე საუბრობს, რომლებიც გერმანიაში კრიმინალს სჩადიან.

ვიდეოს YouTube-ის ავტომატური ინგლისურენოვანი თარგმანიც ახლავს თან, რითიც ირკვევა რომ პოლიტიკოსი დანაშაულის ჩამდენი ემიგრანტების წარმოშობის ქვეყენაში დაბრუნების ინიციატივით გამოდის. ვიდეოს გერმანულენოვან ტრანსკრიპტში "მერცისა" და "ლაიენის" სახელით ძიებისას შედეგები არ არის, რაც ადასტურებს, რომ პოლიტიკოსს თავის გამოსვლაში კანცლერსა და ყოფილ თავდაცვის მინისტრზე არ უსაუბრია.

ამდენად, სოციალურ ქსელში გავრცელებული რუსულენოვანი თარგმანი ყალბია. თომას როკერმანს აღნიშნულ გამოსვლაში მერცსა და ლაიენზე არ უსაუბრია.