ალის ვაიდელის ყალბი თარგმანი სოციალურ ქსელში კვლავ ვრცელდება
2026 წლის თებერვალში ქართულ საინფორმაციო სივრცეში „ალტერნატივა გერმანიისთვის“ თავმჯდომარის, ალის ვაიდელის სიტყვით გამოსვლის ვიდეო გაყალბებული თარგმანით გავრცელდა, რომელშიც, თითქოს ის ზელენსკის მკაცრად აკრიტიკებდა. გადამოწმების შედეგად დადგინდა, რომ რუსულ ენაზე თარგმანი გაყალბებულია იყო და „ალტერნატივა გერმანიისთვის“ თავმჯდომარეს მსგავსი სიტყვები არ უთქვამს.
იგივე სახის დეზინფორმაციას რუსული ანგარიშები ერთი თვის შემდეგაც იგივე ტაქტიკების გამოყენებით ავრცელებენ. წინა შემთხვევაში ვაიდელის განცხადების გაყალბებული თარგმანი რუსულენოვანმა YouTube-არხმა სახელწოდებით „@АНАЛИТИК_АЛЕКСАНДРНОВАК“ გამოაქვეყნა, რომელიც 2026 წლის 6 იანვარს შეიქმნა და რუსულ ენაზე ევროკავშირის და უკრაინის საწინააღმდეგო შინაარსის ვიდეოებს დღემდე აქვეყნებს. არხს მთავარ სურათად ხელოვნური ინტელექტის მიერ შექმნილი ფოტო აქვს გამოქვეყნებული და უცნობია, ვინ დგას მის უკან. ამჯერად გაყალბებული თარგმანის ახალი ვიდეო იგივე სახის YouTube-არხმა, @АлексХиршАНАЛИТИК-მა გამოაქვეყნა, რომელიც 2026 წლის 26 თებერვალს შეიქმნა. აღნიშნულ არხსაც მთავარ სურათად ხელოვნური ინტელექტის მიერ შექმნილი ფოტო აქვს გამოქვეყნებული და Александр Новак-ის მსგავსად, რეალურ ადამიანად და ანალიტიკოსად არის წარმოჩენილი.
რუსი აქტორების მიერ შექმნილი ყალბი და ავთენტურად წარმოჩენილი YouTube-არხები
დეზინფორმაციის ტაქტიკა შემდეგია - რუსი აქტორები ქმნიან YouTube-არხს, რომელსაც ხელოვნური ინტელექტის საშუალებით წარმოაჩენენ რეალური ანალიტიკოსის არხად და არხზე დეზინფორმაციის შემცველ ვიდეოებს აქვეყნებენ. ყველა ვიდეოში ანტი-უკრაინული ნარატივები ფიგურირებს, რომელსაც, თითქოს, ევროპელი პოლიტიკოსები აჟღერებენ. შემდგომ, YouTube-ის არხიდან ვიდეოს რუსული ანგარიშები სხვა პლატფორმებზე ავრცელებენ, მათ შორის TikTok-ზე. სწორედ TikTok-დან აღებული ვიდეო გაავრცელეს ქართულ საინფორმაციო სივრცეში ადგილობრივმა ანგარიშებმა (1, 2, 3).
წარსულში დეზინფორმაციის მსგავსი მეთოდით გავრცელება მიუთითებს, რომ აღნიშნული ვიდეოც გაყალბებულია. ამას ამტკიცებს ალის ვაიდელის პრესკონფერენციის 2025 წლის 3 ნოემბრით დათარიღებული ორიგინალი ვიდეოც.
ორიგინალი ვიდეო და რუსული ანგარიშების მიერ გამოქვეყნებული ვიდეო ყალბი თარგმანით
გაყალბებულ ვიდეოში გერმანელი პოლიტიკოსი, მათ შორის, ამბობს: "მომისმინეთ, ბატონო ზელენსკი, უნგრეთი ათასწლიანი ისტორიის მქონე ქვეყანაა. ის ევროკავშირის სრულუფლებიანი წევრია. ბუდაპეშტთან ულტიმატუმების ენით საუბრის მცდელობა იმის გამო, რომ მათ გაბედეს და საკუთარი ხალხის ინტერესები თქვენს გეოპოლიტიკურ თავგადასავლებზე მაღლა დააყენეს, უბრალოდ სასაცილოა".
რეალურად, პრესკონფერენციაზე ვაიდელი არალეგალი იმიგრანტების დეპორტაციის საკითხზე საუბრობდა და გერმანიის ხელისუფლებას არასაკმარისი იმიგრანტების დეპორტაციის გამო აკრიტიკებდა. მას "ზელენსკი", "ორბანი", "უნგრეთი" საერთოდ არ უხსენებია, როგორც ეს გაყალბებულ რუსულ თარგმანში ისმის.
