ბერლინის მეტრო თუ ნახევრად ღია მატარებლების სადგური? სოციალურ ქსელში ვიდეო მცდარი აღწერით ვრცელდება

მოკლედ საკითხავი

სოციალურ ქსელში გავრცელებული ვიდეოს მტკიცებით, ბერლინის მეტროში წვიმის დროს წყალი ჩავიდა

ვიდეოს ანალიზი და ღია წყაროებში ძიება გვიჩვენებს, რომ ვიდეოზე ასახულია ნახევრად ღია ცის ქვეშ მყოფი მატარებლების სადგური ძლიერი წვიმის დროს.

ქართულ ფეისბუქ სივრცეში გავრცელდა ვიდეო, რომლის გამავრცელებლის მტკიცებითაც ბერლინის მეტროში წყალი ჟონავს (დაარქივებული ბმული). გამავრცელებელი ამის შემდგომ ირონიულად აღნიშნავს, რომ, ალბათ, ბერლინის მეტროში წყლის ჩასვლაც ქართული ოცნების ხელისუფლების ბრალია.

ვიდეოს თავდაპირველი დათვალიერებითაც აშკარაა, რომ სადგური, რომელიც ვიდეოშია ასახული ნახევრად ღია ცისქვეშაა, რადგან მატარებლის სახურავის გასწვრივ მოჩანს ცა და ფონზე მდგარი შენობის მონაკვეთიც. სადგურის და მატარებლის დიზაინით ასევე შეგვიძლია დავასკვნათ, რომ ეს არა მეტროს არამედ მატარებლების სადგურია. მაგალითისთვის ვხედავთ ბაქანის ნომერს 7. ბერლინში მეტროს სადგურები მიმართულებების და არა ბაქნების მიხედვითაა დაყოფილი. მატარებელი ორსართულიანია, რაც გერმანიის რკინიგზის Deutsche Bahn-ის რეგიონული ექსპრესის მატარებლებისთვისაა დამახასიათებელი. ბერლინის მეტროს ორსართულიანი ვაგონები არ ემსახურება.

ქართულ ფეისბუქ სივრცეში გავრცელებული ვიდეო საკმაოდ დაბალი ხარისხისაა და მცირე დეტალების გარკვევა რთულია. უკეთესი ხარისხის ვიდეოს მოძიების მცდელობისას, ვიდეოს ფოტოანაბეჭდის უკუძიებამ მიგვიყვანა გერმანულენოვან ფეისბუქ სივრცეში გავრცელებულ იმავე ვიდეომდე, რომელიც უფრო მაღალი ხარისხისაა და მეტი დეტალის გარჩევის შესალებლობას გვაძლევს. მაგალითად, ტაბლოზე ვხედავთ, რომ ვიდეოში ასახული მატარებელი Nauen-ის მიმართულებით გადის, 11:42-ზე.

აღნიშნული მონაცემების ძიებით ღია წყაროებში დგინდება, რომ ბერლინის Gesundbrunnen-ის მატარებლების სადგურის მეშვიდე პლატფორმიდან რეგიონული ექსპრესი Nauen-ის მიმართულებით სწორედ 11:42-ზე გადის. გუგლის რუკაზე ამ სადგურის ძიებისას ერთ-ერთი პირველი გვხვდება სწორედ მეშვიდე პლატფორმის ფოტო, რომელიც ასევე საკმაოდ წააგავს ვიდეოში ასახულ სადგურს და ფოტოდანაც აშკარაა, რომ აღნიშნული პლატფორმა ნახევრად ღია ცის ქვეშაა.