„ფეისბუქში“ ელენე ხოშტარიას გაყალბებული ციტატა ვრცელდება

სოციალურ ქსელში მომხმარებლები ავრცელებენ ფოტო-ქარდს, რომელზეც ელენე ხოშტარიას ფოტო და თითქოს მის მიერ გაკეთებული განცხადებაა დატანილი (ბმული 1, ბმული 2, არქივირებული ბმული). პოსტის მიხედვით, ელენე ხოშტარიამ თითქოს განაცხადა: „როგორც მიხეილ სააკაშვილი დაიტანჯა ვივამედში, მეც ისე უნდა დავიტანჯო. ამიტომ მოვხვდი აქა.“

პოსტი მიმსგავსებულია ტელეკომპანია „ფორმულას“ მიერ გამოყენებულ დიზაინს. სწორედ მსგავსი დიზაინით ავრცელებს ტელეკომპანია თავის ოფიციალურ სოციალურ ქსელებში ფოტო-ქარდებს, რომლებზეც სხვადასხვა ცნობილი ადამიანის ციტატა თუ მნიშვნელოვანი მოვლენის აღწერაა დატანილი (იხილეთ ბმული). მსგავსი დიზაინი მოცემულ ამბავს დამატებით დამაჯერებლობას სძენს, ვინაიდან ის ნამდვილი მედიასაშუალების მიერ გავრცელებულ ინფორმაციას ემსგავსება.

ფორმულას ოფიციალურ ფეისბუქ-გვერდზე მსგავსი ციტატა არ იძებნება. ბოლო პოსტი, რომელიც ელენე ხოშტარიას შესახებ ტელეკომპანიის სოციალურ ქსელებში შეგიძლიათ ნახოთ, მართლაც ელენე ხოშტარიას ვივამედში გადაყვანის საკითხს ეხება(არქივირებული ბმული).

.

ამდენად, გამოგონილი ციტატის გასავრცელებლად ელენე ხოშტარიას შესახებ ფორმულას მიერ ნამდვილად მომზადებული ქარდია აღებული. შემდგომში, ფოტორედაქტირების პროგრამით მასზე ახალი წარწერაა დატანილი. სინამდვილეში, ელენე ხოშტარიას მსგავსი შინაარსის განცხადება თავად პოლიტიკოსის ოფიცილურ გვერდზე, მედიასაშუალებების სოციალურ ქსელებსა თუ მათ ოფიციალურ საიტებზე არ იძებნება.