სოციალურ ქსელში ხატია დეკანოიძის ყალბი ციტატა ვრცელდება

სოციალურ ქსელში თბილისში 12 ივნისს გამართული ქანიე უესტის კონცერტის კონტექსტში პოლიტიკოს ხატია დეკანოიძეს შემდეგ ციტატას მიაწერენ: "კონცერტი ვჭამოთ? და ზოგადად, ომს რომ კონცერტი გირჩევნიათ, იმიტომ ვართ ფსკერზე." (ბმული 1, 2, არქივირებული ბმული). პოსტს ტელეკომპანია "მთავარის" საინფორმაციო ბარათისთვის დამახასიათებელი ვიზუალი აქვს, რაც გავრცელებულ ინფორმაციას დამატებით დამაჯერებლობას სძენს.

სინამდვილეში მსგავსი ციტატა არ იძებნება "მთავარის" Facebook-გვერდზე. არც სხვა ქართულ მედიასაშუალებებს გაუვრცელებიათ აღნიშნული ციტატა (ბმული 1, 2, არქივი).

12 ივნისს ტელეკომპანია "მთავარის" Facebook-გვერდზე დეკანოიძის იდენტური ფოტოსურათით სულ სხვა შინაარსის მასალა იძებნება (იხ. ქვემოთ). ორიგინალ საინფორმაციო ბარათზე სინამდვილეში პოლიტიკოსი TV პირველის მიერ გასაჯაროვებულ კადრებს ეხმაურება, სადაც ჩანს თუ როგორ ძალადობს პოლიცია მოქალაქეზე: "ეს არაადამიანები მიიღეს პოლიციაში. შეარჩიეს “კონკურსით; გაატარეს “პროფესიონალური” ტრენინგი; დანიშნეს პოლიციაში, მიანიჭეს წოდება; გაუშვეს დავალებაზე, ადამიანების დასაკავებლად მისცეს ძალაუფლება და განყოფილებაში აცემინეს დაკავებულები. მათ ჰყავთ უფროსები, იმათ, კიდევ, მათი უფროსები. ამ სქემაში ჩართულია ყველა: პოლიციის აკადემიიდან - უმაღლესი თანამდებობის პირების ჩათვლით. ეს არის წამება პოლიციის განყოფილებებში, რომელიც იმდენად მასიურია, რომ აღარ იმალება".

აღსანიშნავია ისიც, რომ გაყალბებულ და ორიგინალ საინფორმაციო ბარათებზე განსხვავებული ფონტებია გამოყენებული. გავრცელებულ დეზინფორმაციას სოციალურ ქსელში თავად ხატია დეკანოიძეც გამოეხმაურა და ციტატის ნამდვილობა უარყო.