ვრცელდება დაუსაბუთებელი კონსპიროლოგიური ინფორმაცია ბლექროქის და ვანგარდის „ჟენევის საიდუმლო სამიტის“ და „მოსახლეობის შემცირების გეგმის“ შესახებ

სოციალურ ქსელში ვრცელდება კონსპიროლოგიური პოსტები იმის შესახებ, როგორ ჩატარდა 7-8 მარტს ჟენევაში დახურული სამიტი ბლექროკის (BlackRock), ვანგარდის (Vanguard) და ე.წ. ჩრდილოვანი ელიტების მონაწილეობით. ამ კონსპირაციის მიხედვით შეხვედრაზე განიხილეს „მოსახლეობის შემცირება და რესურსების გადანაწილება აღმოსავლეთ ევროპასა და აზიაში“ (არქივირებული ბმული).

ეს კონსპიროლოგიური ნარატივი პირველად გავრცელდა კონსპირაციული შინაარსით ცნობილ რუსულ ტელეგრამ-არხზე „Конспиратор #1“. პოსტში აღნიშნულია, რომ შეხვედრას „არცერთი ჟურნალისტი არ ესწრებოდა“, ხოლო „შეთქმულების თეორეტიკოსთა არხმა“ თითქოს აუდიოჩანაწერი მოიპოვა. თუმცა არ არის წარმოდგენილი არც დოკუმენტი, არც შეხვედრის მონაწილეთა სია, არც აუდიომასალის წყარო და არც დამოუკიდებელი წყარო.

პოსტში ნახსენები საინვესტიციო კომპანიები კონსპირაციული თეორიების ხშირი სამიზნეები არიან. სოციალურ ქსელებში ხშირად ვრცელდება მტკიცებები, თითქოს ეს კომპანიები აკონტროლებენ მსოფლიოს ეკონომიკასა და ფინანსებს. მსგავსი მტკიცებები ფაქტების გადამმოწმებელი ორგანიზაციების მიერ, მათ შორის, "ჯეოფაქტსის" მიერ აქამდეც გაბათილებულა.

ჟენევის „საიდუმლო სამიტის“ პოსტში ასევე ნახსენებია ე.წ. „მოსახლეობის შემცირების“ თემა, რომელიც თავის მხრივ, ასევე არის ერთ-ერთი ხშირად გავრცელებული კონსპირაციული ნარატივი. გლობალური კონსპირაცია მოსახლეობის ხელოვნურად შემცირების შესახებ სხვადასხვა დროს უკავშირდებოდა ვაქცინების, კლიმატის პოლიტიკის, ეკონომიკური კრიზისების, ომების და სულ ბოლოს COVID-19-ის პანდემიის თემებს. ამ კონსპირაციის ფარგლებში ვრცელდებოდა მტკიცებები, თითქოს ვირუსი ან/და ვაქცინები „მოსახლეობის კონტროლის მიზნით“ შეიქმნა და რომ იგეგმება ე.წ. “დიდი გადატვირთვა.” მსგავსი კონსპირაციული თეორიები ასევე ბევრჯერ გადამოწმდა სანდო მედია საშუალებების და ფაქტების გადამმოწმებლების მიერ და დადასტურდა მათი სიყალბე.

კონსპირაციული ნარატივები ხშირად იყენებს მსგავს ფაბულებს. კერძოდ, ხშირია აპელაცია „საიდუმლო შეხვედრებზე“, აბსტრაქტულ „მსოფლიო ელიტებზე“ და გავლენიან კორპორაციებზე. ასევე, ასეთ ნარატივებში გაძლიერებულია გადაუდებელი საფრთხის განცდა, მაგალითად, იმის მტკიცებით, რომ „საზღვრები მალე დაიხურება,“ ან „მსოფლიო რუკა შეიცვლება.“ ამასთან, მსგავსი კონსპირაციული ტექსტები ხშირად ამტკიცებს, რომ „მედია დუმს“, რაც აუდიტორიას უბიძგებს დაუჯეროს მხოლოდ კონსპირაციულ წყაროს. ჟენევის საიდუმლო შეხვედრის შესახებ გავრცელებული პოსტიც სწორედ ამ აპრობირებულ სქემას იმეორებს.

შესაბამისად, მტკიცება, რომ 7-8 მარტს ჟენევაში ჩატარდა საიდუმლო სამიტი ბლექროკის და ვანგარდის მონაწილეობით მოკლებულია ფაქტობრივ საფუძველს და არ დასტურდება.