სოციალურ ქსელში ვოლოდიმირ ზელენსკის რედაქტირებული ფოტო ვრცელდება

მოკლედ საკითხავი

სოციალურ ქსელში ვოლოდიმირ ზელენსკის ფოტოსურათი გავრცელდა, რომელზეც შეშუპებული და დანაოჭებული სახის კანი აქვს;

რეალურად ფოტოსურათი პროგრამულად დამუშავებულია;

გავრცელებული პოსტის თანახმად, ფოტო 2026 წლისაა, თუმცა რეალურად ის 2023 წელსაა გადაღებული.

სოციალურ ქსელში უკრაინის პრეზიდენტის ფოტოკოლაჟი ვრცელდება. პირველ ფოტოში ზელენსკი ახალგაზრდულად გამოიყურება და მას თარიღად 2019 წელი აქვს მითითებული, ხოლო მეორე ფოტოში, რომელსაც 2026 წელი აწერია, მისი სახე შეშუპებული და დანაოჭებულია. ფოტოს აღწერაში ვკითხულობთ: "კოკაინი შვიდი წლის შემდეგ." საგულისხმოა, რომ ფოტოსურათი იდენტური აღწერით რუსულენოვან სოციალურ ქსელებში ვირუსულად გავრცელდა. (1; 2)

სინამდვილეში ზელენსკის 2026 წლის ფოტოსურათი პროგრამულად დამუშავებულია და არც 2026 წელსაა გადაღებული. რეალურად ფოტოსურათი 2023 წელს უკრაინის ქალაქ ლვივშია გადაღებული და ის ამგვარად გამოიყურება:

გარდა ამისა ფოტო, რომელიც სოციალური ქსელის პოსტის თანახმად, 2019 წლით თარიღდება, რეალურად 2020 წელს, ზელენსკის პრესკონფერენციაზეა გადაღებული. ესტონური ფაქტების გადამმოწმებელი ორგანიზაცია Delfi-ს თანახმად, ფოტო რუსული მედია TASS-ის ფოტო ბიბლიოთეკაშია ხელმისაწვდომი. 2026 წლის 5 თებერვლის მონაცემით, ფოტო TASS-ის გვერდზე აღარ იძებნება, თუმცა შემონახულია Delfi-ის მიერ არქივირებული ბმული.

აღსანიშნავია, რომ მტკიცება ზელენსკის ნარკოდამოკიდებულებასთან დაკავშირებით 2022 წელს რუსეთის უკრაინაში შეჭრის შემდეგ აქტიურად ვრცელდება. მტკიცებები ძირითადად რედაქტირებულ ფოტო/ვიდეო მასალას ეფუძნებოდა და სხვადასხვა ფაქტების გადამმოწმებელ ორგანიზაციასაც მრავალჯერ გადაუმოწმებია. (1; 2; 3)