დონალდ ტრამპისა და ჯეფრი ეპსტინის მონაწილეობით ვიდეო, ხელოვნური ინტელექტითაა შექმნილი

მოკლედ საკითხავი

სოციალურ ქსელში გავრცელებული ვიდეო დონალდ ტრამპისა და ჯეფრი ეპსტინის მონაწილეობით ვიდეო ვრცელდება, სადაც ისინი ბავშვების გარემოცვაში იმყოფებიან.

ვიდეოს მთელი რიგი ვიზუალური მახასიათებლები მიანიშნებს, რომ მის შესაქმნელად ხელოვნური ინტელექტია გამოყენებული. ვიდეო ასევე არ გამოუქვეყნებია არცერთ ავტორიტეტულ მედიასაშუალებას.

სოციალურ ქსელში გავრცელდა ვიდეო, რომელშიც ამერიკის 47-ე პრეზიდენტი დონალდ ტრამპი და ტრეფიკინგსა და პედოფილიაში ბრალდებული, აწ უკვე გარდაცვლილი ფინანსისტი, ჯეფრი ეპსტინი ჩანან. ვიდეოში ტრამპისა და ეპსტინის გარდა სხვა ადამიანებიც ჩნდებიან. ვიდეოს ბოლო მონაკვეთში კი მცირეწლოვანი ბავშვების გამოსახულება ჩნდება, რომლებიც უცნაურ რიტმულ მოძრაობებს ასრულებენ და გარშემო მყოფ ზრდასრულებთან სინქრონში ტაშს უკრავენ.

ვიდეოს შეინიშნება რიგი უზუსტობები, რომლებიც ხელოვნური ინტელექტის კვალზე მიუთითებს. მათ შორისაა ვიდეოში მყოფი ადამიანების არაბუნებრივად გლუვი სახის ნაკვთები, მოუქნელი მოძრაობები, უცნაური ფორმის ხელები და ტანსაცმელი. ვიდეოში ფონზე ასახული მამაკაცების ნაწილს სახის ნაკვთები საერთოდ არ უჩანთ. ზოგი მათგანის ხელი ტაშის დაკვრისას თვალთახედვის არიდან იკარგება. ზოგიერთი ბავშვის სახის გამომეტყველება არაბუნებრივია, ნაკვთები კი თითქოს ერთნაირი.

ასევე აღსანიშნავია, რომ ვიდეო, სადაც ტრამპი, ეპსტინი და ბავშვები ერთად ფიგურირებენ არ გამოუქვეყნებია არცერთ ავტორიტეტულ მედიასაშუალებას (1; 2; 3).

ვიდეოს საწყისი კადრის ფოტოანაბეჭდის საძიებო სისტემაში ჩაშვება გვიჩვენებს, რომ ვიდეოს საფუძვლად უდევს 1997 წელს გადაღებული რეალური ფოტო, რომელზეც ასახულნი არიან დონალდ ტრამპი და ჯეფრი ეპსტინი, რომლებიც Victoria's Secret-ის თეთრეულის წვეულებაზე ბელგიელ მოდელ ინგრიდ სეინჰეივს ესაუბრებიან. აღსანიშნავია, რომ ხელოვნური ინტელექტით შექმნილ ვიდეოში მოდელი არ ფიგურირებს.

ინტერნეტში ხელმისაწვდომია საავტორო უფლებებით დაცული კიდევ ორი ფოტო (1; 2) იმავე წვეულებიდან, სადაც ტრამპი და ეპსტინი ერთად არიან ასახულები. არცერთ ფოტოში არ ჩანან ბავშვები.

აღნიშნული ვიდეოს შესახებ კვლევები გამოქვეყნებული აქვთ ფაქტების გადამმოწმებელ ორგანიზაციებს ამერიკიდან (Snopes) და იტალიიდან (Open.Online), ისევე როგორც BBC-ს ფაქტების გადამოწმების პროექტს. კვლევის შედეგად სამივე ორგანიზაცია მივიდა დასკვნამდე, რომ ვიდეო ხელოვნური ინტელექტითაა შექმნილი.

"ჯეოფაქტსს" მსგავსი შინაარსის სხვა ვიდეო დონალდ ტრამპისა და ჯეფრი ეპსტინის მონაწილეობით 2025 წლის ივლისშიც აქვს გადამოწმებული.