ლარი ფინკს WEF-ის მიზნად კონტროლის ზრდისა და სუვერენიტეტის შეზღუდვის შესახებ საზოგადოების დარწმუნება არ დაუსახელებია

მოკლედ საკითხავი

• გავრცელებული ინფორმაციის თანახმად, Blackrock-ის თანადამფუძნებელმა ფორუმზე WEF-ის მიზნად მეტი გლობალური კონტროლისა და ნაკლები სუვერენიტეტის შესახებ საზოგადოების დარწმუნება დაასახელა;

• დავოსში მსოფლიო ეკონომიკური ფორუმის მიზნებზე ლარი ფინკმა 19 იანვარს ისაუბრა;

• მას გამოსვლისას „გლობალური კონტოლი“ და „ეროვნული სუვერენიტეტი“ საერთოდ არ უხსენებია.

სოციალურ ქსელში გავრცელებული ინფორმაციის თანახმად, მსოფლიო ეკონომიკური ფორუმზე (WEF), Blackrock-ის აღმასრულებელმა ხელმძღვანელმა ფორუმის  მიზნად საზოგადოების დარწმუნება დაასახელა, რომ უფრო დიდი გლობალური კონტროლი და ნაკლები ეროვნული სუვერენიტეტი მათთვის მისაღები გახდეს  (დაარქივებული ბმული).

მსოფლიო ეკონომიკური ფორუმი (WEF) 19 იანვრიდან 23 იანვრის ჩათვლით დავოსში, შვეიცარიის საკურორტო ქალაქში იმართება. გახსნის ცერემონიალზე სიტყვით Blackrock-ის  თანადამფუძნებელი და აღმასრულებელი ხელმძღვანელი ლარი ფინკი გამოვიდა. BlackRock აქტივების მმართველი მსოფლიოს უმსხვილესი კომპანიაა, რომელიც აშშ-შია დაფუძნებული.

ლარი ფინკმა მსოფლიო ეკონომიკური ფორუმზე გამოსვლისას სამიტის ძირითად მიზნებზე ისაუბრა. გთავაზობთ მისი მიმართვიდან იმ მონაკვეთის ქართულ თარგმანს, რომელშიც ფორუმის მიზნებზეა საუბარი. სოციალურ ქსელში სწორედ აღნიშნული მონაკვეთი ვრცელდება:

“გახსნილი გონება გვქონდეს, მოვისმინოთ და ვიფიქროთ, ეს არის დავოსში წლევანდელი მსოფლიო ეკონომიკური ფორუმის მიზანი. ის, რომ ადამიანებს ხალხის ხმების და იდეების უფრო ფართო სპექტრი გავაგონოთ. შესაძლოა, არგუმენტიც კი, მაგრამ ისეთი, რომელიც უფრო ღრმად გვესმის. მე ვფიქრობ, რომ შესაძლოა ყველაფერი ისე კარგად არ ჟღერდეს,  როგორც ეს მუსიკაში ხდება.  მუსიკაშიც ყველაფერში ვერ დაეთანხმები, მაგრამ თუ მზად ხართ, მოუსმინოთ, ამან უკვე შეიძლება რაღაც დაგიტოვოთ. შესაძლოა, რაღაც თქვენში დარჩეს და შესაძლოა, ამის წყალობით, ჩვენც განვითარდეთ და უკეთესები გავხდეთ. ეს  არის ამ კვირაში დავოსში მსოფლიო ეკონომიკური ფორუმის მისია. ასე რომ, გთხოვთ, ისიამოვნეთ დღევანდელი დღით“.

ამდენად,  Blackrock-ის აღმასრულებელ ხელმძღვანელს  გამოსვლისას არ უთქვამს,  რომ WEF-ის მიზანს გლობალური კონტროლისა და ნაკლები ეროვნული სუვერენიტეტის მიმღებლობის ზრდა წარმოადგენს. ლარი ფინკს მთლიან გამოსვლაში „გლობალური კონტროლი“ და „ეროვნული სუვერენიტეტი“ საერთოდ არ უხსენებია. შესაბამისად, სოციალურ ქსელში გავრცელებული მტკიცება არაზუსტია.