სოციალურ ქსელში გავრცელებული ციტატა ნიკა გვარამიას არ ეკუთვნის

სოციალურ ქსელში ტელეკომპანია "მთავარის" ვიზუალით ვრცელდება საინფორმაცია ბანერი (ბმული 1, 2), სადაც თითქოს პარტია "ახალის" ლიდერის ნიკა გვარამიას ციტატაა დატანილი: "თუ ვინმე შემაგინებს ან შეურაცხყოფას მომაყენებს, შსს-თან აუცილებლად ვი**ებ" (არქივირებული ბმული).

აღნიშნულ ფოტოზე თანდართული პოლიტიკოსის ციტატა "მთავარის" Facebook-გვერდზე იძებნება, თუმცა, მასზე სულ სხვა შინაარსის ტექსტია მოცემული. რეალური და სოციალურ ქსელში გავრცელებული საინფორმაციო ბარათებისას შედარებისას, ფონტებს შორის სხვაობაც შეინიშნება, რაც გავრცელებული პოსტის სიყალბეზე დამატებით მიუთითებს. მსგავსი ციტატა არ იძებნება არც პოლიტიკოს Facebook გვერდზე, არც სხვა მედიასაშუალებების გვერდებზე (ბმული 1, 2)

აღნიშნული ციტატა, დიდი ალბათობით, "ქართული ოცნების" მიერ დაანონსებული საჯარო სივრცეში სიძულვილის ენის „სისტემური მონიტორინგის“ მიზნით შსს-ში სპეციალური სამმართველო შეიქმნის კონტექსტში გავრცელდა. მსგავს კონტექსტში ყალბი ციტატა ასევე გამოქვეყნდა ოპოზიციის კიდევ ერთი ლიდერის, "სტრატეგია აღმაშენებლის" თავმჯდომარის, გიორგი ვაშაძის წინააღმდეგ (იხ. "ჯეოფაქტსის" სტატია).