სოფიო ხორგუანის შესახებ ვიდეო მანიპულაციური წარწერით ვრცელდება
სოციალურ ქსელ ფეისბუქში ვრცელდება ვიდეო, რომელშიც პარტია „საქართველოსთვის“ ერთ-ერთი ლიდერი სოფიო ხორგუანი პარლამენტის სხდომაზე სიტყვით გამოდის. საკუთარ გამოსვლაში სოფიო ხორგუანი მოქალაქეების მიერ დაჯარიმებულთა და დაკავებულთა დასახმარებლად გადარიცხულ შემოწირულობებზე საუბრობს. სოფიო ხორგუანი ამბობს: „მაგრამ სახარება ერთხელ წაკითხული რომ გქონდეთ, გემახსოვრებათ ესეთი იგავი „ქვრივი და ორი ლეპტა“. აი ის ორი ლარი თუ ოცი ლარი, რომელიც მოქალაქემ გადაურიცხა იმ დაჯარიმებულს, ბევრად მეტია თავისი მნიშვნელობით“. ვიდეოს ადევს წარწერა: „სახარებაში რომელ იგავში რიცხავენ მოქალაქეები ფულს“. აღნიშნული ვიდეომანიპულაციის მიზანია გვაფიქრებინოს, თითქოს სოფიო ხორგუანი ფიქრობს, რომ სახარების იგავში ფულის გადარიცხვაზეა საუბარი.
სინამდვილეში სოფიო ხორგუანი სახარებისეულ იგავზე საუბრობს ქვრივისა და ორი ლეპტის შესახებ. სახარებაში ვხვდებით ასეთ იგავს - „ქვრივის ორი ლეპტა“ (ბმული 1, ბმული 2). იგავის მიხედვით, იესო ქადაგების შემდეგ საგანძურთან ზის და უყურებს ადამიანები როგორ სწირავენ ფულს. „მრავალმა მდიდარმა ბევრი ჩაყარა. მოვიდა ერთი ღარიბი, ქვრივი დედაკაცი და ჩადო ორი ლეპტა, რომელიც კოდრანტს შეადგენს. დაუძახა მან თავის მოწაფეებს და უთხრა: „ჭეშმარიტად გეუბნებით თქვენ: ამ ღარიბმა ქვრივმა საგანძურში ყველა ჩამდებზე მეტი ჩადო. ვინაიდან ყველამ თავისი მოჭარბებულიდან ჩადო, ამან კი თავისი სინაკლულიდან ჩადო, ყველაფერი, რაც კი სასიცოცხლოდ გააჩნდა.“ [1]
იგავი გვხვდება როგორც მარკოზის, ასევე ლუკას სახარებაში (მარკოზი 12:41-44 და ლუკა 21:1-4). იგავის შინაარსია, რომ იესომ უფრო დასაფასებლად მიიჩნია იმ ადამიანის შეწირული, რომელმაც მიუხედავად შეჭირვებისა თავის თავს მოაკლო და შესწირა, ვიდრე იმ ადამიანების შეწირული, რომლებიც ქონებას ჭარბად ფლობდნენ და ამ სიჭარბიდან წირავდნენ. სოფიო ხორგუანი საკუთარ გამოსვლაში სწორედ ამ იგავზე მიუთითებს შემოწირულობებზე საუბრისას და ყურადღებას მცირედით შემომწირველ მოქალაქეებზე ამახვილებს. იგავს ის სწორედ შემოწირულობის კონტექსტში ახსენებს და არა „ციფრული გადარიცხვების“.
[1] ლეპტა და კოდრანტი ფულის ერთეულებია. ლეპტა ყველაზე დაბალი ღირებულების მონეტაა.
