ტყუილია ცნობები ამერიკელი საზღვაო ქვეითის გაზით გაგუდვის შესახებ
სოციალურ ქსელში გავრცელდა ინფორმაცია, რომლის მიხედვითაც "ამერიკელი საზღვაო ქვეითი, რომელიც ორი დღის წინ ტრამპის სამხედრო ოპერაციას შეეწინააღმდეგ აირანში, ოჯახთან ერთად გაზით გაგუდული იპოვეს (არქივი).
საუბარი არის აშშ-ის საზღვაო კორპუსის ყოფილ ჯარისკაც ბრაიან მაკგინისზე, რომელმაც 2026 წლის 5 მარტს სენატის მოსმენა შეაჩერა, რათა გამოეთქვა თავისი წინააღმდეგობა ირანის წინააღმდეგ აშშ-ისრაელის სამხედრო ოპერაციის მიმართ. მაკგინისი, რომელიც ჩრდილოეთ კაროლინაში სენატის არჩევნებისთვის „მწვანეთა პარტიის“ კანდიდატია, ტრამპის ადმინისტრაციის და აშშ-ის მიერ ისრაელის მხარდაჭერის კრიტიკოსია. სენატის მოსმენისას მაკგინისმა ხმამაღლა დაიწყო ძახილი იმის შესახებ, რომ "ამ ომის მიზეზი ისრაელია, ამერიკას არ სურს ისრაელისთვის ბრძოლა". შედეგად, ის კაპიტოლიუმის პოლიციამ გააძევა, თუმცა მაკგინისმა წინააღმდეგობა გაწია და ჭიდაობისას ხელი მოიტეხა.
მაკგინისი პრო-პალესტინური, ისრაელის საწინააღმდეგო განწყობებით გამოირჩევა, რაზეც მისი X-ის ანგარიში მეტყველებს. ბრაიან მაკგინისის X-ის ანგარიში ასევე ადასტურებს, რომ ინფორმაცია მისი და მისი ოჯახის გარდაცვალების შესახებ, ტყუილია. ქართულმა ანგარიშებმა მცდარი ინფორმაცია 7 მარტს გაავრცელეს, მას შემდეგ მაკგინისი საჯაროდ არაეთხელ გამოჩნდა.
ამავდროულად, გავრცელებულ პოსტში ვკითხულობთ, რომ "ესეთი ინფორმაცია ამერიკულ მედიებში ვრცელდება", თუმცა მსგავსი ცნობა არცერთ ამერიკულ მედიას გაუვრცელებია.
მსგავსი არასწორი ინფორმაციის გავრცელების მიზანი არის საზოგადოებაში იმ კონსპირაციული თეორიის გაძლიერება, რომ დასავლეთს და აშშ-ს ჩრდილოვანი ძალები, "დიფ სტეიტი", გავლენიანი ოჯახები და "საიდუმლო" ჯგუფები მართავენ, რომლებიც მათი დღის წესრიგის მოწინააღმდეგეებს ანადგურებენ.
