დეზინფორმაცია: კაია კალასი USAID-დან ფინანსდებოდა
სოციალურ ქსელში Facebook-მომხმარებელმა ირმა ხახუტაიშვილმა, რომლის გავრცელებული მცდარი ინფორმაცია „ჯეოფაქტსს“ აქამდეც გადაუმოწმებია (ბმული 1, 2, 3), ამტკიცებს, რომ კაია კალასს USAID წლების განმავლობაში ათეულ ათას დოლარს უხდიდა (დაარქივებული პოსტი).
აღსანიშნავია, რომ ეს ინფორმაცია რუსული პროპაგანდისტული ანგარიშების მიერ აქტიურად ზიარდება. მაგალითად ალექსანდ დუგინმა საკუთარ X-ანგარიშზე დაწერა, რომ „კაია კალასი დაფინანსებულია USAID-ის მიერ. მოდით, გადავაყენოთ იგი“(დაარქივებული პოსტი) [რედ. პოსტში, სავარაუდოდ, არასწორადაა გამოყენებული სიტყვა founded (ქართ. დაარსებულია), უნდა ეწეროს funded (ქართ. დაფინანსებულია)].
კაია კალასი ამჟამად საგარეო საქმეთა და უსაფრთხოების საკითხებში ევროკავშირის უმაღლესი წარმომადგენელია. ეს პოზიცია მან 2024 წლის ბოლოს დაიკავა. ინფორმაცია იმის შესახებ, თუ სად მუშაობდა კაია კალასი თავად ევროკავშირის ინსტიტუტების ოფიციალურ ვებგვერდებზეა ხელმისაწვდომი.
მაგალითად, ევროკომისიის ვებგვერდზე მისი კარიერის შესახებ ინფორმაცია 1996 წლიდან მოიპოვება, როცა ის ესტონეთის ეროვნული თეატრის, „ვანემუინეს“ დირექტორის მრჩეველი იყო. ამ პერიოდიდან მოყოლებული ევროკავშირის საგარეო საქმეთა და უსაფრთხოების საკითხებში უმაღლესი წარმომადგენლის პოზიციის დაკავებამდე კაია კალასი იკავებდა იურისტის პოზიციას ორ იურიდიულ ფირმაში და იყო ტრენინგის პროვაიდერი. 2011 წელს ის პოლიტიკაში ერთვება და ხდება ესტონეთის რეფორმების პარტიის და ესტონეთის პარლამენტის რიიგიკოგუს წევრი. 2014-2018 წლებში ის ევროპარლამენტის წევრია და ლიბერალებისა და დემოკრატების ალიანსს წარმოადგენს. 2018 წლიდან ის ესტონეთის რეფორმების პარტიის ლიდერია, ხოლო 2021 წლიდან 2024 პარალელურად ესტონეთის პრემიერმინისტრის პოსტს იკავებდა. ამდენად მას კარიერულად USAID-თან კვეთა არ აქვს.
ფოტო: ევროკომისიის ვებგვერდზე გამოქვეყნებული კაია კალასის ბიოგრაფია
2024 წლის სექტემბერში გამოქვეყნებულ მის დეკლარაციაში (დაარქივებული ბმული) ასევე არაფერია ნათქვამი USAID-ის შესახებ.
2023 წელს ესტონეთის პრემიერმინისტრის პოსტზე მან ღია საზოგადოების პარტნიორობის (OGP) გლობალურ სამიტზე ესტონეთის USAID-თან თანამშრომლობის შესახებ ისაუბრა და მასთან ისედაც ძლიერი ურთიერთთანამშრომლობის კიდევ უფრო გაღრმავების მზაობა გამოხატა. „ბოლო 12 წლის მანძილზე ჩვენ თითქმის 20 პროექტი განვახორციელეთ ერთად, რომელიც კონცენტრირდებოდა გამჭვირვალობის წახალისებაზე, ინკლუზიურ და პასუხისმგებლობიან მმართველობაზე“ – განაცხადა მან და პარტნიორობას დიდი წარმატება უწოდა. თუმცა ამ შემთხვევაშიც ის პრემიერ-მინისტრის პოზიციას იკავებდა და USAID-თან ესტონეთის სახელმწიფოს წარმომადგენლის პოზიციიდან ურთიერთობდა.
შესაბამისად ფაქტი, რომ კაია კალასი დასაქმებული იყო ან პირდაპირ ფინანსდებოდა USAID-ის მიერ საჯარო წყაროებით, არ დასტურდება.
