დეზინფორმაცია: ვიდეოში სომეხი გულშემატკივრები ქართველებს აგინებენ

POSTV-ის ჟურნალისტი ნათია ბერიძე სოციალურ ქსელში ვიდეოს ავრცელებს (დაარქივებული ბმული), რომლის მიხედვითაც, სომეხი გულშემატკივრები ქართველების მისამართით სკანდირებდნენ ფრაზას “თქვენი დედებს შ****ით”, რამაც   სტადიონზე ჩხუბი გამოიწვია. „ეს არის სომხების ტრიბუნიდან გადაღებული ვიდეო “თქვენი დედებს @-ი” რომ სკანდირებენ მერე “F@ y@-“ დანარჩენიც გესმით!“, – წერს ჟურნალისტი. რეალურად, სომეხი გულშემატკივრები სომხურ ენაზე სკანდირებდნენ ფრაზას „მელიკბეკიან წადი“ (სომხურად:„მელიკბეკიან ჰერაცირ”). ფრაზა არმენ მელიკბეკიანს, სომხეთის ფეხბურთის ფედერაციის პრეზიდენტს მიემართებოდა და არა-ქართველებს.

საქართველო-სომხეთს შორის საფეხბურთო მატჩი 23 მარტს  „დინამო არენაზე“  გაიმართა. მატჩის შემდეგ, რომელიც საქართველოს ნაკრების სასარგებლოდ 6:1 დასრულდა, სტადიონზე არეულობა დაიწყო.  საქართველოს ფეხბურთის ფედერაციის პრეზიდენტის ლევან კობიაშვილის თქმით, აღნიშნული შემთხვევა შესაძლოა უეფას მხრიდან სანქციების მიზეზი გახდეს.

ვიდეოში, რომელსაც ნათია ბერიძე ავრცელებს, სინამდვილეში, სომეხი გულშემატკივრები სკანდირებენ ფრაზით  „მელიკბეკიან ჰერაცირ“, რაც ქართულად ნიშნავს  „მელიკბეკიან, წადი“. შეძახილი სომხეთის ფეხბურთის ფედერაციის პრეზიდენტ, არმენ მელიკბეკიანს მიემართებოდა, კერძოდ, სომეხი გულშემატკივრები მის გადადგომას ითხოვდნენ.

არმენ მელიკბეკიანი საქართველო-სომხეთის მატჩს დინამო არენას VIP- ლოჟიდან  ესწრებოდა. სომეხი გულშემატკივრები მის გადადგომას, მატჩის დაწყების წინაც ითხოვდნენ და სწორედ ლოჟისკენ იხედებოდნენ.

ნათია ბერიძის  მიერ გამოქვეყნებულ ვიდეოში ჩანს, რომ მელიკბეკიანის გადადგომის მოთხოვნით გულშემატკივრები მატჩის დასრულების შემდეგად სკანდირებდნენ. ვიდეოს დასაწყისში ჯერ კიდევ სტადიონზე დაპირისპირება დაწყებული არ არის.

მატჩის დასრულების შემდეგ, სომეხი ფეხბურთელები გულშემატკივრებთან მივიდნენ, ამის შემდეგ კი გასახდელისკენ გადაადგილება დაიწყეს. სწორედ ამ მომენტში გულშემატკივრებმა დაიწყეს სკანდირება ფედერაციის პრეზიდენტის გადადგომის მოთხოვნით, აღნიშნული ნათია ბერიძის მიერ გავრცელებულ ვიდეოშიც ჩანს. ერთ-ერთი სომხური ტელევიზიის ლაივშიც ჩანს, რომ სწორედ ფეხბურთელების გასახდელისკენ გადაადგილებისას იწყება (იხილეთ ბმულზე 03:20 წუთიდან) დაპირისპირებაც, რაც კიდევ უფრო ამყარებს ვარაუდს, რომ დაპირისპირება ფრაზების არასწორად გაგებას მოჰყვა. თუმცა, ამ ეტაპზე  დაპირისპირების ზუსტი მიზეზი დადგენილი არ არის.

ამდენად, პოსტში აღნიშნული მტკიცება, რომ ვიდეოში სომეხი გულშემატკივრები ქართველებს აგინებენ, მცდარია.