დეზინფორმაცია: შოთა არველაძემ ირაკლი კობახიძე ვილი სანიოლის შეცდომებზე სასაუბროდ მიიწვია
სოციალურ ქსელში ვირუსულად გავრცელდა საინფორმაციო ბარათი (ბმული 1, 2, 3, 4), რომლის მიხედვით, შოთა არველაძემ ირაკლი კობახიძე ვილი სანიოლის შეცდომებზე სასაუბროდ მიიწვია (დაარქივებული პოსტი).
„ვიწვევ ბატონ პრემიერს ბოლო სანაკრებო პაუზის დროს ვილი სანიოლის შეცდომებზე სასაუბროდ. წამოიყვანოს ვინც მას უნდა…“, – წერია პოსტებში გამოქვეყნებულ ფოტოზე.
აღსანიშნავია, რომ ინფორმაცია სოციალურ ქსელში მხოლოდ აღნიშნული ფოტოს სახით გავრცელდა. ამასთანავე, მიუხედავად იმისა, რომ ის ქართული მედიების მიერ გამოქვეყნებული საინფორმაციო ბარათების სტილს იმეორებს, მასზე არცერთი მედიის ლოგო, ან სხვა ნიშანი დატანილი არაა.
სინამდვილეში, საჯარო წყაროებით არ დასტურდება, რომ ფეხბურთელმა შოთა არველაძემ ეს განცხადება გააკეთა. Facebook-ზე გამოქვეყნებული საინფორმაციო ბარათი კი, სავარაუდოდ, ირაკლი კობახიძის განცხადებაზე საპასუხოდ სახუმარო შინაარსის გამოხმაურებაა.
შოთა არველაძეს Facebook-ზე ოფიციალური, ვერიფიცირებული გვერდი აქვს, სადაც ის პოსტებს აქვეყნებს. თუმცა მსგავსი შინაარსის განცხადება მის ოფიციალურ გვერდზე არ იძებნება. პირადი სოციალური ქსელების გარდა, განცხადება მას შესაძლოა მედიაში გაევრცელებინა, თუმცა მსგავსი განცხადება არც სანდო მედიასაშუალებებს გამოუქვეყნებიათ.
ცნობისთვის, 17 დეკემბერს ირაკლი კობახიძემ განაცხადა: „კონკრეტული ადამიანები გამოდიან ხოლმე აქციებზე განცხადებებით, რომ არავინ გველაპარაკება, რატომ არ ესაუბრებიან ამ ხალხს, გამოდიოდა, თუ არ ვცდები, შოთა არველაძე აქციაზე. მან განაცხადა, რომ ხელისუფლება არ უსმენს და არ ელაპარაკება ხალხს, როცა ორი კვირაა, ვიმეორებთ იმას, რომ მზად ვიყავით ნებისმიერ ფორმატში, მათ შორის საჯარო ფორმატში საჯარო დისკუსიისთვის. მოვიდეს შოთა არველაძე, წამოიყვანოს, ვისი კომპეტენციისაც სჯერა, დავსხდეთ და ვილაპარაკოთ. აქვე ვაკეთებ ამ შეთავაზებას. რამდენჯერაც გავაკეთე ასეთი განცხადება, იმდენჯერ მივიღე დუმილი პასუხად“.
ირაკლი კობახიძემ მიმართვა 26 დეკემბერსაც გაიმეორა, როცა აღნიშნა, რომ შოთა არველაძეს დისკუსიაში ჩართვა სთხოვა, თუმცა ის მას განერიდა. „შემდეგ გამოვიდა, მაგალითად, შოთა არველაძე, მან გამოთქვა სინანული იმის გამო, რომ ხელისუფლება არ ესაუბრებოდა საზოგადოებას. აქაც მას მივმართე, წამოეყვანა 10-12 კაცი, ვის კომპეტენციაშიც ან გულწრფელობაშიც იყო დარწმუნებული და აქაც ნახეთ გარიდება საჯარო დისკუსიისგან. ისევე ეშინიათ მათ დისკუსიის, როგორც ფილმებში ეშმაკს რომ ჯვარს აჩვენებენ და ისტერიკას უპირისპირებს, ასეთი რაღაც ემართებათ“, – აღნიშნული იყო განცხადებაში.
სატირული შინაარსის ყალბი პოსტები, სადაც თითქოს შოთა არველაძე ირაკლი კობახიძეს მიმართავდა და სანაკრებო პაუზის დროს ვილი სანიოლის შეცდომებზე სასაუბროდ იწვევდა, სოციალურ ქსელში სწორედ ამ განცხადებების შემდეგ გავრცელდა.
ამდენად, შოთა არველაძის სახელით გავრცელებული ციტატა ყალბია და არ დასტურდება, რომ მან მსგავსი განცხადება გააკეთა.
