ტელეკომპანია „იმედმა“ და მედია-ჰოლდინგმა „რეპორტიორი“ რიკარდ იოზვიაკის განცხადება არასრული კონტექსტით, მანიპულაციურად გაავრცელეს

სოციალურ ქსელში Facebook-ზე ტელეკომპანია „იმედმა“ და მედია-ჰოლდინგ „რეპორტიორის“ Facebook-გვერდმა გამოაქვეყნეს საინფორმაციო ბარათი და სტატია სათაურით: „რიკარდ იოზვიაკი: საქართველომ ასევე მიაღწია პროგრესს იმ 9 ნაბიჯის განხორციელებაში, რომელიც დადგენილია ევროკომისიის 2023 წლის გაფართოების შესახებ ანგარიშში“. სათაურის ფორმულირება ქმნის შთაბეჭდილებას, რომ „რადიო თავისუფლების“ ევროპის ბიუროს რედაქტორის, რიკარდ იოზვიაკის, განცხადებით, საქართველომ 9 ნაბიჯის განხორციელებაში პროგრესს მიაღწია (დაარქივებული ბმული: 1, 2).

სინამდვილეში, სათაურსა და საინფორმაციო ბარათზე რიკარდ იოზვიაკის განცხადება სრული სახით დატანილი არაა. სრულ განცხადებაში „რადიო თავისუფლების“ ევროპის ბიუროს რედაქტორი საქართველოს მხოლოდ უმნიშვნელო პროგრესზე საუბრობს.

კერძოდ, რიკარდ იოზვიაკმა საკუთარ X-ის ანგარიშზე საქართველოს შესახებ ევროკომისიის გაფართოების ანგარიშიდან, მისი შეფასებით, საკვანძო ნაწილი გამოაქვეყნა. მასში აღნიშნული იყო, რომ „სანამ საქართველო არ შეცვლის მოქმედებათა მიმდინარე კურსს, რომელიც საფრთხეს უქმნის ევროკავშირისკენ მის გზას და არ აჩვენებს ხელშესახებ ძალისხმევას შეუსრულებელი გამოწვევების გადასაჭრელად და ძირითადი რეფორმებისთვის, კომისია ვერ განიხილავს საქართველოსთან მოლაპარაკებების გახსნის რეკომენდაციას”.

თავის პოსტზევე პასუხად, მან ასევე ყურადღება გაამახვილა, მისი თქმით, კიდევ ერთ „მამხილებელ, თუმცა არა გასაკვირ“ ფაქტზე, რომ საქართველოს მიერ 9 ნაბიჯის განხორციელების პროგრესი უმნიშვნელო იყო (იხილეთ დაარქივებული პოსტი).

„საქართველომ მიაღწია უმნიშვნელო პროგრესს ევროკომისიის 2023 წლის გაფართოების შესახებ ანგარიშში დადგენილი 9 ნაბიჯის განხორციელებაში“, – აღნიშნულია მის განცხადებაში.

სოციალურ ქსელში გამოქვეყნებული საინფორმაციო ბარათსა და სტატიის სათაურზე დატანილი წინადადება – „საქართველომ ასევე მიაღწია პროგრესს 9 ნაბიჯის განხორციელებაში…“, – საქართველოს ევროკავშირში გაწევრიანების გზაზე არსებულ პროგრესზე დადებით შთაბეჭდილებას ქმნის. მაშინ, როდესაც რეალურად, რიკარდ იოზვიაკის მიხედვით, ევროკომისიის ანგარიშში საუბარია იმაზე, რომ საქართველომ ევროკომისიის 2023 წლის გაფართოების შესახებ ანგარიშში დადგენილი 9 ნაბიჯის განხორციელებაში უმნიშვნელო პროგრესს მიაღწია. ეს უკანასკნელი კი, თავის მხრივ, ხაზს იმას უსვამს, რომ საქართველოს პროგრესი არასაკმარისია. შესაბამისად, პროგრესზე საუბრისას სიტყვა „უმნიშვნელოს“ გამოტოვება რიკარდ იოზვიაკის განცხადებას შინაარსს უცვლის.

ცნობისთვის, მიუხედავად იმისა, რომ მედია-ჰოლდინგ „რეპორტიორის“ სრულ სტატიაში რიკარდ იოზვიაკის განცხადება სრულადაა გადმოტანილი, Facebook-ზე ის მხოლოდ არასრული სახით არის მოცემული, რასაც Facebook-ზე აუდიტორია შეცდომაში შეჰყავს. ასევე, სტატიის სათაურში სიტყვის – „უმნიშვნელო“ – გამოტოვება განცხადებას შინაარსს არსებითაც უცვლის და მანიპულაციურია.

ამდენად, საინფორმაციო ბარათზე ან სტატიის სათაურად ევროკომისიის მიერ განსაზღვრული 9 ნაბიჯის შესრულების კუთხით მხოლოდ სიტყვა „პროგრესის“ დატანა მანიპულაციურია და სრულყოფილად არ მოიცავს იმ კონტექსტს, რომ რიკარდ იოზვიაკის მიხედვით, ევროკომისიის გაფართოების ანგარიშში ეს პროგრესი „უმნიშვნელოდ“ არის დახასიათებული.