სოციალურ ქსელში მიშა მშვილდაძის კომენტარი კონტექსტის გარეშე ვრცელდება

მოკლედ საკითხავი

ქართულ ფეისბუქ სივრცეში გავრცელებული პოსტის მიხედვით, მიშა მშვილდაძემ განაცხადა, რომ ტელეკომპანია "ფორმულაში" გაჩენილმა ხანძარმა ისე შეაშინა, რომ თანამშრომლები ოფისში დატოვა და თავად გაიქცა.

მიშა მშვილდაძის შესაბამისი კომენტარის სრული ვერსიის გაცნობა გვიჩვენებს, რომ მას განცხადება მსგავსი ფორმით არ გაუკეთებია.

ქართულ ფეისბუქ სივრცეში გვერდმა "განულებული ოპოზიცია" გამოაქვეყნა პოსტი, რომლის მტკიცებითაც ტელეკომპანია "ფორმულას" დირექტორმა, მიშა მშვილდაძემ, განაცხადა "ხანძარმა ისე შემაშინა, თანამშრომლები ოფისში დავტოვე და მე გავიქეციო" (დაარქივებული ბმული). პოსტს თან ერთვის ხელოვნური ინტელექტის გამოყენებით შექმნილი საილუსტრაციო ფოტო.

2026 წლის 4 ნოემბერს ტელეკომპანია "ფორმულას" შენობაში ხანძარი გაჩნდა, რის შედეგადაც ტელევიზიას მაუწყებლობის შეყვეტა მოუწია და თანამშრომლების უსაფრთხოებისთვის მათი ევაკუაციაც გახდა საჭირო. იმავე საღამოს ტელეკომპანია "ფორმულას" დირექტორმა მიშა მშვილდაძემ ტელეკომპანია "პირველის" ეთერში, ინგა გრიგოლიას "დღის ამბებში" ისაუბრა განვითარებული მოვლენების შესახებ. გადაცემის ბოლოს გვხვდება მშვილდაძის ის სიტყვები, რომლებიც სავარაუდოდ სოციალურ ქსელში გავრცელებული მანიპულაციის საფუძველი გახდა.

მშვილდაძემ თქვა (ვიდეოში 2:45:30-ზე): "ძალიან ბევრი პრობლემა გავიარეთ და გავდივართ. ეს არის კიდე რაღაცა ახალი და მოულოდნელი, რისთვისაც მზად, მე ყოველ შემთხვევაში აღმოჩნდა, რომ არ ვიყავი იმიტომ, რომ ქვევით ჩასულმა აღმოვაჩინე, რომ ზევით ხალხი არიან. მაგას არ ვიცი, ძაან დიდხანს ეყოფა ჩემს სინდისს ჩემს საქენჯნად ეგ ამბავი, მაგრამ ნუ, თავს იმით გავიმართლებ რომ ძალიან მოულონდელი იყო და ძალიან დამაბნეველი და თან ეს ბოლი." ამის შემდგომ მშვილდაძეს თანამშრომელი ჩაეჭრა და უთხრა: "იმიტომ რომ იცოდი, რომ ევაკუაცია გამოცხადდა", რაც მშვილდაძემ დაადასტურა და მიუთითა, რომ მისი ინფორმაციით ყველა უკვე ქვემოთ იყო ჩასული ან ჩადიოდა.

შესაბამისად, კონტექსტიდან ცხადია, რომ მშვილდაძემ ევაკუაციის პროცესში სხვა თანამშრომლებთან ერთად დატოვა შენობა და მისი ინფორმაციით, სწორედ ამ დროს ტოვებდა ყველა შენობას, თუმცა ქვემოთ ჩასულმა აღმოაჩინა, რომ შენობაში ხალხი კიდევ იყო დარჩენილი. სწორედ ამის გამო თქვა მან, რომ მას ამის გამო სინდისი კიდევ დიდი ხანი შეაწუხებს, სავარაუდოდ იმიტომ, რომ მოულოდნელობისა და დაბნეულობის გამო არ გადაამოწმა სწორი იყო თუ არა მისი წარმოდგენა, რომ შენობა ევაკუაციის დროს მასთან ერთად ყველა მისმა თანამშრომელმა დატოვა.