მცდრია, რომ ISIS-ი ისრაელს თავს არასდროს დასხმია

სოციალურ ქსელში ვრცელდება პოსტი, რომელშიც აღნიშნულია: "ISIS არის "ისლამური" ტერორისტული ორგანიზაცია, რომელსაც არასდროს განუხორციელებია ებრაელებზე თავდასხმა!!" (არქივირებული ბმული).

სინამდვილეში საჯარო წყაროებში ხელმისაწვდომია ინფორმაცია იმ თავდასხმების შესახებ, რომელიც ისლამურმა სახელმწიფომ ისრაელის წინააღდეგ განახორციელა.

მაგალითად, 2017 წელს „ისლამურმა სახელმწიფომ“ (ISIS) პასუხისმგებლობა აიღო ორ რაკეტაზე, რომლებიც ღამით სინაის ნახევარკუნძულიდან ისრაელის სამხრეთ მიმართულებით იქნა გაშვებული. აღნიშნული ინფორმაცია „ისლამურ სახელმწიფოსთან“ დაკავშირებულმა საინფორმაციო სააგენტო „ამაქმა“ ტერორისტული ჯგუფის სახელით გაავრცელა.

მანამდე 2015 წელს, ასევე სინაის ნახევარკუნძულიდან „სინაის პროვინციის“ დაჯგუფებამ, რომელიც ისლამურ სახელმწიფოსთან იყო დაკავშირებული, განაცხადა, რომ „ოკუპირებული პალესტინის“ მიმართულებით სამი „გრადის“ ტიპის რაკეტა გაუშვა.

ISIS-მა ასევე პასუხისმგებლობა აიღო 2022 წელს ისრაელში, ქალაქ ჰადერაში განხორციელებულ სროლაზე, რომელშიც 2 ადამიანი დაიღუპა, 6 კი დაიჭრა. CNN-ის თანახმად, ის, რომ თავდასხმაზე პასუხისმგებლობა ISIS-მა აიღო, SITE Intelligence Group-მა გააკეთა. ჯგუფმა ISIS-თან დაკავშირებული საინფორმაციო სააგენტო „ამაქის“ მიერ გავრცელებულ პოსტზე დაყრდნობით განაცხადა, რომ „ამაქმა“ გამოაქვეყნა სოციალურ ქსელებში გავრცელებული ვიდეოდან ამოღებული კადრი, რომელშიც თავდასხმამდე ორი ნიღბიანი მამაკაცი ISIS-ის ლიდერისადმი ერთგულებას ფიცს დებს.

ამდენად, მცდარია მტკიცება, რომ ISIS-ი არასდროს დასხმია თავს ისრაელს.