თამარ ჩერგოლეიშვილის კონტექსტიდან ამოღებული ციტატა

სოციალურ ქსელ ფეისბუქში ვრცელდება „ფედერალისტების“ ერთ-ერთი ლიდერის თამარ ჩერგოლეიშვილის კონტექსტიდან ამოღებული ციტატა, სადაც ის ამბობს „თუ ჩემთან ერთად არ იომებენ, სანქციები მაინც დააკისრონ და შეშფოთება მაინც გამოთქვან და თუნდაც მეხუთე დღეს“, რაც ტოვებს შთაბეჭდილებას, რომ ამერიკის მხრიდან შეშფოთებაც საკმარისი დახმარებაა (არქივირებული ბმული). პოსტის ავტორის განმარტებითი ტექსტიც - „ანუ ამერიკა ჩვენი ომის დროს თუ უბრალოდ შეშფოთდება ეგეც დახმარებააო ჩერგომ“ ამაზე მიუთითებს.

სინამდვილეში ეს არის კონტექსტიდან ამოღებული ციტატა. 2026 წლის 3 ივლისს თამარ ჩერგოლეიშვილი იმყოფებოდა გადაცემაში (არქივი) “VERSUS ირინა ტორონჯაძესთან ერთად”, სადაც პოლიტიკურ საკითხებზე ედებატებოდა ზურაბ მახარაძეს.

ამ დებატის დროს თამარ ჩერგოლეიშვილი ხსნის (33-ე წუთიდან), თუ როგორ უნდა იყოს საქართველო უფრო დაცული. ის ყურადღებას ამახვილებს ქვეყნის ჯარის მზადყოფნაზე და ეროვნული რეზერვის სისტემაზე, შემდეგ კი ავითარებს არგუმენტს, რომ საქართველოს უნდა ჰქონდეს მჭიდრო ურთიერთობები რუსეთის მოწინააღმდეგე ქვეყნებთან, რომლებიც, თუ არ იომებენ საქართველოსთან ერთად, სანქციებს მაინც დააწესებენ რუსეთზე და გაუზრდიან მას აგრესიის ფასს. ამ კონტექსტში მას მაგალითად მოჰყავს 2008 წლის აგვისტოს ომი, როდესაც ომის მეხუთე დღეს ჯორჯ ბუშმა გადაწყვიტა საქართველოში გამოეგზავნა ფლოტი ჰუმანიტარული დახმარების მოწოდების მოტივით, რამაც გავლენა მოახდინა რუსეთის სამხედრო კალკულაციებზე.

შესაბამისად, თამარ ჩერგოლეიშვილის ფრაზა „თუ ჩემთან ერთად არ იომებენ, სანქციები მაინც დააკისრონ და შეშფოთება მაინც გამოთქვან და თუნდაც მეხუთე დღეს“ რეალურად ამგვარად გრძელდება - „თვითმფრინავს დასვამს, გამოვა და ბრიფინგს ჩაატარებს ამერიკის პრეზიდეტი და თათბირს ჩაატარებს და რუსეთს ეტყვის, რომ გაწიე შენი ძალები, რადგან ჩემი ძალები ჯდებიან მანდ.“ ამ კონტექსტში ჩერგოლეიშვილის მთავარი გზავნილი არის, რომ მტერს თავდასხმა უნდა უჯდებოდეს ძვირი და რომ დასავლეთთან მოკავშირეობა არის ამის მიღწევის გზა.