სატირა თუ რეალური პოსტი? სოციალურ ქსელში ტვ იმედის ვიზუალით გაყალბებული ქარდი ვრცელდება

მოკლედ საკითხავი

სოციალურ ქსელში გავრცელებული ქარდი, რომელიც ტვ "იმედის" ვიზუალით ვრცელდება, ამტკიცებს, რომ მიხეილ ყაველაშვილი მსოფლიოს ლამაზ პრეზიდენტებს შორის დასახელდა.

ღია წყაროებში ძიება არ ადასტურებს, რომ ტვ "იმედს" მსგავსი საინფორმაციო ბარათი თავის ინტერნეტ გვერდებზე ან სოციალურ ქსელებში ჰქონდა განთავსებული.

ქართულ ფეისბუქ და ინსტაგრამ სივრცეში გავრცელდა პოსტი, რომელიც ტვ იმედს მიკუთვნებული საინფორმაციო ქარდის სახითაა წარმოდგენილი (დაარქივებული ბმული). ქარდზე განთავსებული მტკიცების მიხედვით, პრეზიდენტ მიხეილ ყაველაშვილი მსოფლიოს ლამაზ პრეზიდენტებს შორის დასახელდა.

ღია წყაროებში მსგავსი ინფორმაციის ძიება ქართულ ენაზე არ გვაძლევს რაიმე სარწმუნო წყაროს, რომელიც მტკიცებას დაადასტურებდა. გვხვდება მხოლოდ იმავე ინფორმაციის გამზიარებელი ფეისბუქ და ინსტაგრამ ანგარიშები.

მსგავს შედეგს ვიღებთ ინგლისურ ენაზე ძიებისასაც, იმის გამოსარიცხად, რომ საუბარი შეიძლება იყოს რაიმე არაფორმალურ საერთაშორისო რეიტინგზე.

გავრცელებული საინფორმაციო ბარათი არ იძებნება თავად ტვ "იმედის" Facebook-გვერდზე.

დამატებით, თავად გავრცელებული ქარდის დათვალიერებაც გვაძლევს მინიშნებებს, რომ ის, დიდი ალბათობით, ნამდვილი არაა. მაგალითად, მარჯვენა ქვედა კუთხეში ვხედავთ ვარსკვლავისებურ მონიშვნას, რომელიც ინსტაგრამზე გაზიარებულ იმავე შინაარსის პოსტებში უკეთ ჩანს. აღნიშნული მონიშვნა, როგორც წესი Google-ის Gemini ხელოვნური ინტელექტის მიერ შექმნილ მასალებს ერთვის ხოლმე თან.

ასევე უცნაურია, რომ ქარდზე დატანილ ინფორმაციას მარცხენა ზედა მხარეს უწერია "ყაველაშვილი". მსგავსი მონიშვნა, როგორც წესი, ციტატის ავტორის იდენტიფიცირებისთვის ხდება ხოლმე. თუმცა გავრცელებული ფრაზა უფრო მტკიცების ფორმისაა, ვიდრე ციტატის. ასევე ნაკლებ სავარაუდოა, რომ მიხეილ ყაველაშვილს საკუთარ თავზე მესამე პირში ესაუბრა, რომ ის მსოფლიოს ლამაზ პრეზიდენტებს შორის დასახელდა.

ამდენად, სოციალურ ქსელში გავრცელებული პოსტი რედაქტირებულია.