სოციალურ ქსელში მაგდა მამუკაშვილის კომენტარი პროტესტის მონაწილეებზე უკონტექსტოდ ვრცელდება

მოკლედ საკითხავი

ქართულ ფეისბუქ სივრცეში ვრცელდება აქტივისტ მაგდა მამუკაშვილის ციტატა, სადაც ის თითქოს აღიარებს, რომ პროტესტის მონაწილეები "ნორმალურები არ არიან".

ციტატა კონტექსტიდან ამოვარდნილია და სრული ვიდეოს გაცნობა გვიჩვენებს, რომ მამუკაშვილი პროტესტის მონაწილეების გამძლეობაზე საუბრობს.

ქართულ ფეისბუქ სივრცეში ვრცელდება მოკლე ვიდეო, რომელშიც საპროტესტო მოძრაობის მონაწილე აქტივისტი, მაგდა მამუკაშვილი ამბობს "ცოტა არ ვართ ნორმალურები, მე სხვა კომენტარი არ მექნება. რაღაცა დაგვემართა, რაღაც საერთო..." (დაარქივებული ბმული). ეს ვიდეოს გამავრცელებლის მიერ წარმოდგენილია, როგორც აღიარება, რომ საპროტესტო მოძრაობის მონაწილეები სრულ ჭკუაზე არ არიან. ვიდეოს თან ახლავს გამავრცელებლის მოკლე კომენტარი სიცილის სიმბოლოებით "ცოტა არა ძალიან".

ქართულ ფეისბუქ სივრცეში გავრცელებული ვიდეოს მონაკვეთი ამოღებულია მაგდა მამუკაშვილის ჩართვიდან ტელეკომპანია ფორმულას 1-ლი ივლისის გადაცემაში "კომენტარი". ჩართვისას მამუკაშვილი თორნიკე თოშხუასა და მინდია შერვაშიძის საპატიმროდან გათავისუფლებაზე საუბრობს და კომენტარს აკეთებს იმ ფაქტზე, რომ ისინი გათავისუფლების საღამოს აპირებენ რუსთაველის გამზირზე საპროტესტო აქციას შეუერთდნენ.

სწორედ ამ კონტექსტში, წამყვანის კითხვაზე თუ რა მუხტს შემოიტანს საპატიმროდან გათავისუფლებული აქტივისტების დაბრუნება რუსთაველის გამზირზე, მაგდა მამუკაშვილი ამბობს "ცოტა არ ვართ ნორმალურები" და აგრძელებს საუბარს იმაზე, რომ საპატიმროდან გათავისუფლებული აქტივისტების უმრავლესობა სწორედ ასე იქცევა და გათავისუფლების დღესვე კვლავ უერთდება პროტესტს, მიუხედავად საპატიმროში თვეების განმავლობაში ჯდომისა. მამუკაშვილი ამას აფასებს როგორც ქვეყნისადმი სიყვარულის გამვლინებას, რაც, მისი აზრით, აქტივისტებს ყველას ერთად დაემართათ.

შესაბამისად, კონტექსტის გაცნობის შედეგად ცხადი ხდება, რომ ფრაზით "ცოტა არ ვართ ნორმალურები" მაგდა მამუკაშვილი არ გულისხმობს, რომ პროტესტის მონაწილე აქტივისტები, მისი ჩათვლით, საღ გონებაზე არ არიან. აღნიშნულს აქტივისტი პოზიტიურ კონტექსტში, პროტესტის მონაწილეების საბრძოლო განწყობის ხაზგასასმელად იყენებს.