სოციალურ ქსელში სალომე ზურაბიშვილის გამოგონილი ციტატა ვრცელდება

სოციალურ ქსელ „ფეისბუქში“ მომხმარებელი აქვეყნებს ფოტოს, რომელზეც საქართველოს მე-5 პრეზიდენტის სალომე ზურაბიშვილის ციტატაა მოცემული (არქივირებული ბმული). აღნიშნული ფოტო შემდგომში სხვა მომხმარებლებმაც გაავრცელეს (ბმული 1, ბმული 2). ფოტოზე დატანილი ციტატის მიხედვით, საქართველოს ყოფილმა პრეზიდენტმა თითქოს თქვა შემდეგი: „არავის საქმე არაა აბორტს გავიკეთებ თუ კლიზმას“. პოსტის აღწერაში ავტორი ბიძინა ივანიშვილს აკრიტიკებს ასეთი პრეზიდენტის შერჩევის გამო და იყენებს არანორმატიულ ლექსიკასაც.

სინამდვილეში სალომე ზურაბიშვილს ამგვარი განცხადება არ გაუკეთებია და მსგავსი შინაარსის განცხადება მედიასაშუალებების გვერდებზე არ იძებნება.

ფოტოზე მოცემულია სრულიად საქართველოს ახალაღსაყდრებული პატრიარქის შიო მესამის საჯარო ქადაგებიდან ნაწყვეტი. 17 მაისს გამართულ ღონისძიებაზე პატრიარქი შიო შეეხო აბორტის თემას და აღნიშნა: „თუ ოჯახში ტრიალებს ისეთი მძიმე ცოდვა, ისეთი როგორიცაა აბორტი, მაგალითად, მაშინ რა თქმა უნდა, ასეთ საფუძველზე ვერანაირ ბედნიერებას ვერ ააშენებს ოჯახი და განწირულია ასეთი ოჯახი“.

განცხადებას მალევე გამოეხმაურა სხვადასხვა საჯარო პირი. ქარდი, რომელიც გავრცელდა, შექმნილია „მთავარის“ დიზაინის მიხედვით. თავად მთავარის „ფეისბუქის“ გვერდზე გაზიარებულია სალომე ზურაბიშვილის გამოხმაურებაც. მედიასაშუალების მიხედვით, სალომე ზურაბიშვილი პატრიარქის განცხადებას სინამდვილეში შემდეგნაირად გამოეხმაურა: "ასეთი ოჯახი განწირულია? ასეთი უმოწყალო სიტყვები, ასეთი მკაცრი განაჩენი… იმედს რომ არ ტოვებს, არც ღვთის უზომო სიყვარულისა, არც ადამიანის რწმენით გადარჩენის???!!!" (არქივირებული ბმული) ეს განცხადება საქართველოს ყოფილმა პრეზიდენტმა საკუთარ "ფეისბუქ" გვერდზე განათავსა (არქივირებული ბმული).

ამის ფონზე, სოციალურ ქსელებში პოპულარული მედიასაშუალების დიზაინის მიბაძვით შექმნილი ქარდის გავრცელებამ მკითხველი შესაძლოა შეცდომაში შეიყვანოს, ვინაიდან მკითხველს ის ნამდვილი მედიის გავრცელებული ჰგონია.

ფოტოს ორიგინალი ვერსია სხვა მომხმარებელმა გაავრცელა, რომელმაც პოსტის აღწერაშივე დაურთო, რომ აღნიშნული ფოტო სატირული შინაარსისაა. (არქივირებული ბმული)

ამგვარად, სალომე ზურაბიშვილის ეს ციტატა გამოგონილია და საქართველოს მე-5 პრეზიდენტს მსგავსი განცხადება სინამდვილეში არ გაუკეთებია.