ანა კობახიძის შესახებ სოციალურ ქსელებში რედაქტირებული ვიდეო ვრცელდება

„ინსტაგრამზე“ გავრცელდა ვიდეო, რომლის მიხედვითაც, პოლიტიკური პარტია "სტრატეგია აღმაშენებლის" წევრის, ანა კობახიძეს ინტერვიუს დროს უცნობმა პირმა სიტყვიერი შეურაცხყოფა მიაყენა. ვიდეოში ანა კობახიძე ინტერვიუს იძლევა და ამ დროს უცნობი გამვლელი, რომელიც კადრში არ ჩანს და მისი მხოლოდ ხმა ისმის, მას შეურაცხყოფას აყენებს. აღნიშნული ვიდეო ტიკტოკზეც გავრცელდა.

სინამდვილეში, ვიდეოს ორიგინალი ვერსია ანა კობახიძის 12 მაისის ინტერვიუდან აღებულია. პოლიტიკოსი ტელეკომპანია „პირველის“ ჟურნალისტ დიანა ტრაპაიძის გადაცემის პირდაპირ ეთერში ერთვება და 26 მაისის აქციის მოსამზადებელ კამპანიას აჯამებს. ინტერვიუს სრული და დაუმუშავებელი ვერსიის ნახვის შემდეგ ცხადი ხდება, რომ ინციდენტი, რომელიც სოციალურ ქსელებში გავრცელდა, სინამდვილეში არ მომხდარა და ეს ვიდეომონტაჟის პროგრამის საშუალებით შექმნილი რედაქტირებული ვიდეოა.

ინტერვიუს ეს კონკრეტული ნაწილი მოჭრილია 6:10 წუთიდან და მასზე დადებულია ხმა ფილმიდან „რა მოხდა კიევში“, რომელშიც ზალიკო ბერგერის პერსონაჟი არანორმატიული ლექსიკით მის გამტაცებლებს მოიხსენიებს. მონტაჟისას აღნიშნული ხმა დადებულია საავტომობილო სიგნალის შემდეგ. პოლიტიკოსს საავტომობილო სიგნალზე აქვს რეაქცია, ის იხედება ხმის მიმართულებით, აკეთებს მოკლე პაუზას ინტერვიუში და მალევე აგრძელებს საუბარს. მონტაჟით ხმის ამ მომენტზე გადაფარვა ვიდეოს დამატებით ავთენტურობას სძენს, ვინაიდან ისმის არა უბრალოდ კადრს მიღმა ხმა, არამედ თითქოს პოლიტიკოსიც რეაგირებს მასზე. სინამდვილეში, აღნიშნული ინციდენტი საერთოდ არ მომხდარა და ვიდეო რედაქტირებულია.