არ დასტურდება სოციალურ ქსელში გავრცელებული მტკიცება, რომ დედა ტერეზა ბავშვთა ტრეფიკინგში იყო ჩართული

მოკლედ საკითხავი

სოციალურ ქსელში გავრცელდა ინფორმაცია, რომ დედა ტერეზა ბავშვებს ყიდდა და ამით ვატიკანი სოლიდურ შემოსავალს იღებდა.

გავრცელებული მტკიცების დამადასტურებელი მტკიცებულებები არ არსებობს.

2018 წელს ინდოეთში დედა ტერეზას მიერ დარსებული საქველმოქმედო ორგანიზაციის მიერ ბავშვების ტრეფიკინგის საკითხზე გამოძიება დაიწყო, თუმცა მასშიც თავად დედა ტერეზას ბრალეულობა არ იკვეთება.

სოციალურ ქსელში გავრცელდა მტკიცება, რომ დედა ტერეზა ბავშვებს ყიდდა, რითაც ვატიკანი ყოველწლიურად სოლიდურ შემოსავალს იღებდა. მტკიცების ავტორი პარალელს ავლებს ტრეფიკინგსა და პედოფილიაში ბრალდებულ ფინანსისტ ჯეფრი ეპსტინის საქმიანობასთანაც.

დედა ტერეზა კათოლიკე მონაზონი იყო, რომელმაც 1950 წელს ინდოეთში დაარსა ორგანიზაცია "ქველმოქმედების მისიონერები" და მას გარდაცვალებამდე, 1997 წლამდე ხელმძღვანელობდა. დედა ტერეზამ 1979 წელს ნობელის პრემია მიიღო მშვიდობის დარგში, ხოლო 2016 წელს პაპმა ფრანციკსემ ის წმინდანად შერაცხა.

ღია წყაროებით ინფორმაციის ძიება დედა ტერეზას მიერ ბავშვებით ვაჭრობასთან დაკავშირებით არ იძლევა რაიმე შედეგს, რაც მის ამ დანაშაულში მონაწილეობას დაადასტურებდა.

თუმცა ამ ძიებას მივყავართ სტატიებამდე (1; 2; 3), რომელთა მიხედვითაც 2018 წელს ინდოეთის ჯარკანდის პროვინციის პოლიციამ ბრალი წარუდგინა დედა ტერეზას მიერ დაარსებულ საქველმოქმედო ორგანიზაციაში მომუშავე რამდენიმე ადამიანს. პირებს ბრალი ბავშვებით ვაჭრობაში ედებოდათ.

ინდოეთის ხელისუფლების ცნობით, 2018 წელს ინდოელმა წყვილმა განაცხადა, რომ თავშესაფარში მომუშავე ანიმა ინდვარს 120 000 რუპია (იმ დროს 1,760 აშშ დოლარი) გადაუხადეს. პოლიციამ განაცხადა, რომ ისინი თავშესაფრიდან ბავშვების გაყიდვის ბრალდებით ინდვარის წინააღმდეგ კიდევ სამ საჩივარს იძიებდნენ. ბრალის წარდგენა წყვილის საჩივარს მოჰყვა, რომ საქველმოქმედო ორგანიზაციის თანამშრომელმა უკან წაიყვანა ბავშვი, რომელიც მათ უნდა ეშვილათ, თუმცა ფული არ დააბრუნა.

სპიკერმა სუნიტა კუმარმა ადგილობრივ მედიას განუცხადა, რომ „ქველმოქმედო მისიონერები“ გამოძიებას აწარმოებდნენ. მან თქვა, რომ საქველმოქმედო ორგანიზაციას წარსულში არასდროს აუღია ფული მშობლებისგან შვილად აყვანის ორგანიზებისას.

იმ დროისათვის როცა დანაშაული მოხდა, დედა ტერეზა 21 წლის გარდაცვლილი იყო. "ქველმოქმედების მისიონერების" რამდენიმე წევრისთვის ბრალის წარდგენას მოჰყვა მათგან ერთ-ერთის დაკავება, 14 დღის ბავშვის გაყიდვის ბრალდებით.

მტკიცებები დედა ტერეზას მიერ ბავშვებით ვაჭრობის შესახებ Reuters-სა და AP-საც აქვთ გადამოწმებული. ორივე ავტორიტეტული გამოცემა ასევე მივიდა იმ დასკვნამდე, რომ მტკიცებები უსაფუძვლო იყო.