თელ-ავივის დაბომბვის კადრები ხელოვნური ინტელექტით არის შექმნილი

ირანის წინააღდმეგ აშშ-ისრაელის საერთო სამხედრო ოპერაციის პარალელურად სოციალურ მედიაში ისრაელის დედაქალაქის დაბომბის კადრები გავრცელდა, რომელიც ხელოვნური ინტელექტით არის შექმნილი. ქართულენოვანი ანგარიშები ვიდეოს ფოტოანაბეჭდს ავრცელებენ, თუმცა ხელოვნური ინტელექტით შექმნილი ვიდეო საერთაშორისო მასშტაბით გავრცელდა.

ვიდეოში არსებული დეტალები და მისი გავრცელების მეთოდი ადასტურებს, რომ ის ხელოვნური ინტელექტით არის შექმნილი.

პირველ რიგში, ვიდეო სანდო მედია საშუალებებს არ გაუვრცელებიათ. Google-ის უკუძიების ხელსაწყოთი გადამოწმების შემდეგ აღმოჩნდა, რომ მას მხოლოდ ინდივიდუალური ანგარიშები და ანონიმური გვერდები ავრცელებენ. ქართული ანგარიშის ფოტოანაბეჭდი აღებულია ვიდეოდან, რომელიც უცხოურმა ანონიმურმა Facebook-გვერდმა "Forest Flow-მ" გაავრცელა. ამ გვერდის მიერ გამოქვეყნებული თითქმის ყველა ვიდეო ხელოვნური ინტელექტის მიერ არის შექმნილი.

როგორ ამოვიცნოთ ხელოვნური ინტელექტით შექმნილი ფოტო-ვიდეო?

როდესაც ხელოვნური ინტელექტისთვის ინსტრუქციის მიცემისას ნახსენებია კონკრეტული ქვეყანა, იმისათვის, რომ ცხადი იყოს თუ რომელ ქვეყანას ასახავს გენერირებული ვიდეო, ხელოვნური ინტელექტი ამ ქვეყნის დროშას არაერთხელ აჩენს ვიდეოში. სწორედ აქედან გამომდინარეობს, რომ თელ-ავივის დაბომბვის გენერირებულ ვიდეოში ისრაელის სამი დროშა ჩანს. ამავდროულად, ვიდეოში ისმის სიტყვა "თელ-ავივი", რადგან, სავარაუდოდ, ხელოვნურ ინტელექტს მისცეს ინსტრუქცია, რომ გენერირებულ ვიდეოში თელ-ავივი აღბეჭდილიყო. სწორედ ამიტომ, ვიდეოში ისმის სიტყვა "თელ-ავივი". როგორც ჩანს, იმისათვის რომ ცხადი იყოს რა ქალაქი არის აღბეჭდილი გენერირებულ ვიდეოში, ხელოვნურმა ინტელექტმა ვიდეოში ქალაქის სახელიც გააჟღერა.

მიუხედავად იმისა, რომ ხელოვნური ინტელექტის მიერ შექმნილი ვიდეოები უფრო და უფრო ემსგავსება ნამდვილს, მას ჯერ კიდევ უჭირს ფიზიკის კანონების გათვალისწინება. მაგალითად, ამ კონკრეტულ ვიდეოში ჩანს, რომ, ერთის მხრივ, ქარი მარცხნიდან მარჯვნივ უბერავ, რასაც მოწმობს დროშები, ხოლო იმავდროულად მარჯვნიდან მარცხნივ უბერავს, რაც ჩანს აფეთქებების მიერ გამოწვეული კვამლის მოძრაობით. დამატებით, ვიდეოში აფეთქებების მიერ გამოწვეული კვამლი არაბუნებრივად სწრაფად მოძრაობს.

ხელოვნური ინტელექტის მიერ შექმნილ ვიდეოებს ხშირად ახასიათებთ მასში აღბეჭდილი ობიექტების დეფორმაცია. განსაკუთრებით მაშინ, როდესაც ვიდეოში ბევრი ობიექტი ფიგურირებს. შესაბამისად, ხელოვნური ინტელექტის ამოცნობისას უნდა დავაკვირდეთ პატარა დეტალებს. ამ ვიდეოს შემთხვევაში, მარცხენა ქვემო კუთხეში უცნაური ფორმის მანქანა და გაურკვეველი საგანი ჩანს.

ბოლო წლებში, კონფლიქტების პარალელურად, სულ უფრო ხშირად ვრცელდება ვიდეოები, რომლებიც, თითქოს, დაბომბვას, საარტილერიო ჭურვებს, რაკეტებს, სამხედრო შეიარაღებას და ომთან დაკავშირებულ სხვა კადრებს აჩვენებს. მსგავსი ვიდეოების ამოცნობისას უნდა დავაკვირდეთ თუ საიდან ჩნდებიან საგნები, რამდენად რეალურად გამოიყურება აფეთქების მომენტი და რა შედეგი მოჰყვება აფეთქებას. მოცემული ვიდეოს შემთხვევაში რაკეტა, რომელიც კორპუსს ეცემა, თავად რაკეტის მიერ გამოშვებული კვამლიდან ჩნდება.

ვიდეოში რაკეტა კორპუსს ხვდება, თუმცა აფეთქების შემდგომ კორპუსი უვნებელი რჩება, რაც კიდევ ერთი ნიშანია, რომ ვიდეო ხელოვნური ინტელექტით არის შექმნილი.

ცნობისთვის, 28 თებერვალს ირანის წინაღმდეგ აშშ-ისრაელის საერთო სამხედრო ოპერაციის დაწყების შემდეგ თელ-ავივი რამდენჯერმე ბალისტიკური რაკეტებით დაიბომბა, თუმცა იმ მასშტაბის ნგრევა, რაც მოცემულ ვიდეოში ჩანს, არ გამოუწვევია.