მინდია შერვაშიძის სატელევიზიო ჩართვის მონაკვეთი სოციალურ ქსელში მანიპულაციურად ვრცელდება

მოკლედ საკითხავი

ფეისბუქში გავრცელდა მოკლე მონაკვეთი აქტივისტ მინდია შერვაშიძის ჩართვიდან ინგა გრიგოლიას გადაცემა "რეაქციაში".

მონაკვეთი შერვაშიძის მიმიკებზე დაყრდნობით ქმნის შთაბეჭდილებას, რომ ის პროტესტის გამარჯვებაში დარწმუნებული აღარაა.

ჩართვის სრული ვერსია გვიჩვენებს, რომ მინდია შერვაშიძე პროტესტში გამარჯვებაზე საუბრობს.

ქართულ ფეისბუქ სივრცეში გავრცელდა საპროტესტო მოძრაობის მონაწილე აქტივისტის, მინდია შერვაშიძის სატელევიზიო ჩართვიდან მოკლე მონაკვეთი, რომელშიც იგი წამყვან ინგა გრიგოლიას კითხვას პასუხობს (დაარქივებული ბმული). მონაკვეთში წამყვანი შერვაშიძეს ეკითხება, ციხიდან გამოსულს კვლავაც ექმნება თუ არა შთაბეჭდილება, რომ საპროტესტო მოძრაობა გაიმარჯვებს. ვიდეოს გამავრცელებელი, შერვაშიძის მიმიკებსა და თვალების მოძრაობაზე დაყრდნობით ქმნის შთაბეჭდილებას, რომ ის გამარჯვებაში დარწმუნებული აღარაა. გავრცელებულ მონაკვეთში არ ჩანს შერვაშიძის პასუხი. ჩართვის კადრებს მოჰყვება კომიკოს ნიკა არაბიძის სიტყვები "დაფიქრდა ეს დედა*^%".

მინდია შერვაშიძის ინგა გრიგოლიასთან საუბრის სრული ვერსია ტვ პირველის გადაცემა რეაქციის 2 ივლისის გამოშვებიდანაა. შერვაშიძემ საპატიმრო დაწესებულება ჩართვამდე ერთი დღით ადრე, 1-ლ ივლისს დატოვა და საპროტესტო აქციებს რუსთაველის გამზირზე იმავე დღეს დაუბრუნდა.

ინგა გრიგოლიას შეკითხვაზე "გარეთ გამოსულს ისევ შეგექმნათ ეს განცდა, რომ აუცილებლად გავიმარჯვებთ?" მინდია შერვაშიძე პაუზის გარეშე პასუხობს "რა თქმა უნდა". როგორც ზემოთ აღინიშნა, მისი ეს პასუხი ქართულ ფეისბუქ სივრცეში გავრცელებულ მოკლე ვიდეოში არ ფიგურირებს. მიმიკები და თვალების მოძრაობა, რომელზეც გავრცელებული ვიდეო მანიპულირებს, სავარაუდოდ იმას უკავშირდებოდა, რომ მინდია შერვაშიძე წამყვანის მიერ დასმული კითხვის, რომელიც მას ყურსასმენის საშუალებით მიეწოდებოდა, აღქმას ცდილობდა.